Vdekja e një të moshuari, i cili u rrah brutalisht pasi u kërkoi të rinjve të mos bënin zhurmë, tronditi shoqërinë franceze dhe qeverinë, e cila dënoi vrasjen e viktimës.
Philippe Matot, një pensionist 72-vjeçar, u sulmua natën e 5-6 korrikut jashtë shtëpisë së tij në Vie-Comte, një komunitet i vogël në Francën veriore. Ai ndërroi jetë të martën si pasojë e plagëve të rënda.
Tre të rinj të moshës 14, 17 dhe 18 vjeç, u arrestuan një ditë pas sulmit.
17-vjeçari, i cili është i dyshuari kryesor, dyshohet se e ka goditur atë “me grushta dhe shkelma”, edhe pse Mato ishte shtrirë në tokë, pasi kishte marrë goditjen e parë në fytyrë, tha prokurori. Ai akuzohet për vrasje nga pakujdesia dhe i është caktuar masa e paraburgimit.
Dy miqtë e tij akuzohen për mosparandalimin e një krimi dhe mosdhënie ndihme për një person në rrezik, akuza që mbartin një dënim me pesë vjet burg.
Tre të rinjtë jetojnë me prindërit e tyre në një komunitet pranë Vie-Comte dhe thuhet se janë penduar për krimin. Ata thanë se 72-vjeçari u bërtiti nga dritarja e tij që të largoheshin nga zona sepse po bënin zhurmë dhe më pas doli në rrugë rreth orës 23:00. Pasoi një “përleshje” mes tyre, sipas të rinjve, pasi nuk ka dëshmitarë të tjerë. Një automobilist që kalonte e pa viktimën të shtrirë në rrugë dhe thirri 911 rreth orës 00:20 atë mbrëmje.
Bota politike ka shprehur neverinë e saj për krimin pasi vendi është ende duke u rimëkëmbur nga plaçkitjet dhe trazirat që pasuan vdekjen e një djali 17-vjeçar, i cili u qëllua nga një oficer policie pranë Parisit në fund të qershorit.
Vdekja e 72-vjeçarit dëshmon për “këtë dhunë që ne duhet të luftojmë me vendosmëri”, tha zëdhënësi i qeverisë Olivier Veran. “Kjo tragjedi nuk do të mbetet pa u ndëshkuar”, premtoi ministri i Brendshëm Gerald Darmanen, duke folur për një “sulm frikacake të papërshkrueshme”.
Udhëheqësja e ekstremit të djathtë Marine Le Pen denoncoi “mungesën e plotë të respektit për jetën njerëzore”, ndërsa kreu i Partisë Socialiste Olivier Faure foli për “linçim të neveritshëm” dhe Partinë Komuniste për “barbari”.
