Ministrat Gjiknuri dhe Klosi ishin në Vlorë në kuadër të dëgjesave të llogaridhënies publike. Gjatë këtyre takimeve dy ministrat parashtruan projektet e investimeve për këtë qark, siç është dhe ai për rrugën Orikum-Himarë.
Dëgjesat me banorë të Vlorës ishin pjesë e turit të llogaridhënies publike të ministrave Gjiknuri e Klosi. Gjatë takimit me qytetarët ministri i Infrastrukturës dhe Energjisë Damian Gjiknuri u ndal tek projektet në infrastrukturë ndërsa prezantoi edhe planin për ndërtimin e rrugës së re Orikum-Himarë si pjesë e paketës “1 miliard për rindërtim”.
“Vlora ka përspektivë zhvillimi nëse ka investime të këtij karakteri që unë po ju them. Ne jemi duke punuar për t’i dhënë zgjidhje përfundimtare edhe problemit të mbetjeve në Vlorë, një investim që do të fillojë shumë shpejt nga qeveria shqiptare. Gjithashtu, bashkia ka sjellë një projekt për trajtimin e ujërave të zeza. Shumë shpejt do të lidhet kontrata për lotin e dytë të rrugës së Lumit të Vlorës dhe do pasohet me kontratën e tretë për të lidhur Selenicën me pjesën Levan-Tepelenë por dhe Qeparoin me pjesën e Kuçit”.
Ndërsa Ministri për Turizmin dhe Mjedisin Blendi Klosi u shpreh optimist që këtë sezon turistik Vlora do të mirëpresë më shumë vizitorë.
“Ajo që kemi bërë gjatë gjithë këtyre kohëve është përgatitja për sezonin turistik. Janë disa arritje në këtë fushë dhe pot ë krahasohet me numrin e turistëve gjithnjë e më tepër shtohet numri. Sot në darkë mbërrin charteri i parë nga Finlanda. Është një arritje në fushën e turizmit në Shqipëri, janë 30 mijë turistë që vijnë për herë të parë në Shqipëri. Duhet që këtë vit sezoni turistik të jetë i mirëmenaxhuar”.
Ndërkaq, në takimin me banorë të Novoselës ministri Gjiknuri parashtroi përfitimet që do të ketë kjo zonë me ndërtimin e aeroportit të Vlorës si një vepër e cila do të nxisë ekonominë dhe punësimin në zonë.
“Po avancojmë edhe me Aeroportin e Vlorës që siç ju e dini do të ndërtohet në Akërni. Shpresoj që për disa muaj ne ta përfundojmë edhe kontratën dhe pastaj ne të fillojmë procesin e lejeve dhe ndërtimin e aeroportit. Ky investim do të sjellë shumë zhvillim dhe jo vetëm punësim për njerëzit këtu pasi do të ketë shumë shërbime. Do të ketë edhe një rrugë të re që të ketë një lidhje më të mirë të aeroportit me autostradën”.
Në këto dëgjesa, ministri Gjiknuri sqaroi dhe lidhur me investimet në energjetike dhe në infrastrukturë, duke garantuar zgjidhjen e shqetesimeve qe kane shoqeruar prej kohesh banoret e ketyre zonave.
“Mbaruam linjën 110 kilovolt, mbaruam dhe nënstacionin. Po shikojmë për disa fonde edhe nga OSHEE që brenda një viti ky problem të zgjidhet për gjithë zonën tuaj. Siç zgjidhëm atë të madhen ku janë 3 milionë euro të investuara, po bëjmë edhe një projekt për pjesën e Shëtitores, pra pjesa e Radhimës përfshirë dhe rrugën e re drejt Llogarasë”, theksoi Gjiknuri. /abcnews.al
