Nga Erblina Mile
Kontratat e reja të sigurimeve në vend kanë pësuar një rënie me rreth 28% në 7 muaj të 2020.
Problemet ekonomike dhe kriza për shkak të pandemisë kanë bërë që shqiptarët të lidhin më pak kontrata.
Autoriteti i Mbikëqyrjes Financiare bën me dije se gjatë periudhës janar-korrik 2020, numri i kontratave të sigurimit të lidhura arriti në 524,347 me një ulje prej 28% krahasuar me periudhën janar-korrik 2019.
Mesa duket tërmeti i 26 nëntorit ka ndërgjegjësuar shqiptarët për të rritur sigurimet për pronën nga zjarri dhe fatkeqësitë natyrore.
Po ashtu në total në 7 muaj pagesa është me madhe sidomos për dëmet e shkaktuara nga tërmeti dhe arrin në 2,2 miliard lekë, ose 48.29 % të totalit të dëmeve të paguara gjithsej.
Gjatë periudhës janar-korrik 2020, dëmet e paguara bruto në tregun e sigurimeve, arritën në rreth 4,5 miliard lekë në total.
Përsëri sigurimet vijojnë të jenë të orientuara tek ato të detyrueshme duke zënë mbi 93 % të totalit të kontratave që bëhen në sektorin e sigurimit.
Vlen të theksohet se të ardhurat nga sigurimet e jetës gjatë periudhës janar-korrik 2020, arritën rreth 582 milionë lekë, ose rreth 20% më pak se në periudhën janar-korrik 2019.
Po ashtu edhe numri i kontratave motorike ka pësuar ulje.
/abcnews.al/
