Lufta në Ukrainë po hyn në muajin e saj të 11-të dhe beteja për Ukrainën që po shpaloset para syve tanë ka potencialin të jetë ngjarja më transformuese në Europë që nga Lufta e Dytë Botërore dhe konfrontimi më i rrezikshëm për botën që nga kriza e raketave kubane.
Muajin e kaluar, Vladimir Putin pranoi se lufta e Rusisë në Ukrainë mund të bëhet një “proces afatgjatë”, duke shtypur shpresat për një mbyllje të konfliktit në të ardhmen e afërt.
Putini nuk ka aftësinë për të vendsour një lider kukull në Ukrainë dhe thjesht ta lërë atje: një kukull do të përballej me një kryengritje të përhershme. Pra, Rusia duhet të vendosë përgjithmonë dhjetëra mijëra trupa në Ukrainë për ta kontrolluar atë dhe ukrainasit do të qëllojnë mbi ta çdo ditë.
Është e tmerrshme se sa pak Putini ka menduar se si përfundon lufta e tij.
Por, si mund të përfundonte lufta?
Armëpushimi
Ndërsa luftimet vazhdojnë, një negocim mund të zhvillohet dhe mund të vijë një armëpushim i përkohshëm.
Seth Jones, drejtori i Qendrës për Studime Strategjike dhe Ndërkombëtare, i tha Business Insider: “Kjo ndoshta nuk do të sillte një fund të luftës, por kjo do të sillte një rënie të gjendjes aktive të luftës duke e çuar drejt një konflikti të ngrirë, që mund të nxehet apo ftohet në varësi të faktorëve, raporton abcnews.al.
Marrëveshja e paqes
Një marrëveshje paqeje mund të arrihet midis Ukrainës dhe Rusisë, por kjo do të thotë që të dyja palët duhet të bien dakord se cili është territori i tyre. Në dhjetor, Vladimir Putin, dha sinjalet e para se Rusia është e gatshme të nënshkruajë një marrëveshje paqeje, për t’i dhënë fund luftës.
Ai pranoi gjithashtu për herë të parë se kishte pasur probleme në mobilizimin e qindra mijëra rekrutëve për të luftuar në konflikt. Nga ana tjetër presidenti ukrainas Volodymyr Zelenskyy ka thënë vazhdimisht se Rusia duhet të largohet nga të gjitha territoret e pushtuara përpara se të fillojnë bisedimet e paqes.
Tërheqja e forcave ruse
Në muajt e fundit, Ukraina ka ndërmarrë një kundërofensivë efektive dhe ka shtyrë forcat ruse nga territoret e pushtuara. Megjithatë, ekspertët besojnë se forcat ruse nuk do të heqin dorë lehtësisht nga territori.
Mark Cancian, një kolonel i pensionuar i marinës amerikane dhe këshilltar i lartë në Qendrën për Studime Strategjike dhe Ndërkombëtare, i tha Business Insider: “Në Rusi, gjëra të këqija u ndodhin sunduesve që humbin luftërat”, raporton abcnews.al.
Duke nënkuptuar në këtë mënyrë që gjasat për një tërheqje të mundshme ruse nga ana e Putinit janë pothuajse inekzistente. Por nëse Putini vazhdon përpara dhe rrafshon qytetet më të mëdha të Ukrainës dhe kryeqytetin e saj, Kievin, ai dhe të gjithë miqtë e tij nuk do t’i shohin më kurrë apartamentet në Londër dhe Nju Jork, që blenë me të gjitha pasuritë e tyre të vjedhura.
Nuk do të ketë më Davos dhe Shën Moritz. Në vend të kësaj, ata të gjithë do të mbyllen në një burg të madh të quajtur Rusi, me lirinë për të udhëtuar vetëm në Siri, Krime, Bjellorusi, Korenë e Veriut dhe Kinë, ndoshta.
Fëmijët e tyre do të dëbohen nga shkollat private nga Zvicra në Oksford. Ose ata do të bashkëpunojnë për të rrëzuar Putinin ose të gjithë do të ndajnë qelinë e tij të izolimit.
E njëjta gjë për publikun e gjerë rus. E kuptoj që ky skenar i fundit është më i pamunduri nga të gjithë, por është ai që mban më shumë premtime për arritjen e ëndrrës që pamë kur ra Muri i Berlinit në vitin 1989 – një Europë e plotë dhe e lirë, nga Ishujt Britanikë në Vladivostok.
/abcnews.al
