Policia italiane ka çmontuar një bandë që merrej me trafik droge dhe ka vënë në pranga 11 persona.
Mësohet se bëhet fjalë për 5 italianë dhe 6 shqiptarë.
Droga transportohej në Puglia dhe më pas shpërndahej edhe në rajone të tjera.
Baza e prodhimit dhe shpërndarjes së drogës ishte zhvendosur nga Shqipëria në provincat e Barit dhe Foggia.
Nga këtu, organizata kriminale shpërndante sasi të mëdha droge në rajone të tjera, si Bazilikata dhe Siçilia.
Sistemi i zhvilluar nga një bandë e përbërë nga pesë italianë dhe gjashtë shqiptarë ishte një sistem i sprovuar: dhjetë u arrestuan nga Dia me akuzën e prodhimit dhe shitjes së drogës, mbajtjen dhe marrjen e armëve të vjedhura; një person është ende në kërkim.
11 personat janë nën hetim për arsye të ndryshme për prodhim dhe shitje të lëndëve narkotike si dhe mbajtje armësh.
Hetimet
Masa e sigurimit është dhënë në kuadër të operacionit “Zemra” pas hetimeve të kryera tetor 2018-tetor 2019, të cilat bënë të mundur mbledhjen e provave ndaj 5 italianëve dhe 6 shqiptarëve.
Policia zbuloi 2 plantacione të rritura në serra, ku gjetën mbi 8 mijë rrënjë marijuanë me peshë mbi 1 ton e gjysmë, nga të cilat do të mund të përfitoheshin mbi 10 mijë doza droge për t’u hedhur në treg.
Krimet e diskutueshme
Gjyqtari njohu indikacione të rënda faji ndaj të dyshuarve, çështja e të cilëve u përcaktua si “profesionale”. Ato akuzohen për 32 ngjarje të lidhura me sekuestrimin e dy plantacioneve, për transferime të ndryshme në lidhje me një total prej 140 kilogramë hashash, gjysmë kilogram kokainë të pastër, 113 kilogramë marijuanë si dhe në lidhje me posedimin dhe marrjen në dorëzim të dy pistoletave të kalibrit 9, objekt sekuestrimi, me numra serialë të gërryer.
Ekzekutimi i operacionit “Zemra” është vazhdim i projektit më të gjerë hetimor të DDA dhe Dia di Bari lidhur me luftën ndërkombëtare kundër fenomenit të trafikut të drogës nga Shqipëria në Puglia, në kuadër të të cilit operon, duke filluar nga viti 2017, një grup i përbashkët hetimor.
Ky instrument bashkëpunimi gjyqësor, i krijuar ndërmjet DDA të Barit, Prokurorisë së Posaçme Kundër Korrupsionit dhe Krimit të Organizuar të Tiranës dhe Eurojust-it (organ që mbështet bashkëpunimin gjyqësor në luftën kundër formave të rënda të krimit ndërkombëtar), lejon stafin e DIA të Bari dhe Autoritetet Shqiptare të kryejnë hetime të përbashkëta.
Nga veprimet e përbashkëta hetimore janë finalizuar operacionet Shefi, Kulmi dhe Shpirti, pas hetimeve të kryera edhe në Itali dhe Shqipëri.
Këto operacione përfunduan me 118 masa paraprake dhe sekuestrimin e disa milionë eurove./abcnews.al/
