Ishte reparti i fundit që duhej të “blindohej”. Pas nuk arritën të siguronin shërbimet e brazilianit Bento, “Zikaltërit” e Inter kanë siguruar shërbimet e një tjetër “gardiani”, i cili do t’i shtohet kampionëve të Italisë, si forcë e dytë, për sezonin e ardhshëm, pas “helvetit” të portës, Yann Sommer.
Sipas raportimeve më të fundit të mediave italiane, “Zikaltërit” kanë arritur marrëveshjen me “Kuqeblutë” e Genoa, për kartonin e spanjollit, Josep Martinez dhe se të martën e 2 korrikut janë prenotuar vizitat mjekësore në Milano dhe më pas pritet që “shtatlarti” i portës, të bëjë edhe prezantimin zyrtar, për ta nisur sezonin e ri nën urdhrat e Simone Inzaghit.
Për kartonin e 26-vjeçarit, “Zikaltërit” do të derdhin në arkat e Genoa, plot 13 milionë euro e sa i përket kontratës personale, “iberiku” do të nënshkruajë një marrëveshje, 5-vjeçare, me planin e drejtuesve të Inter është që këtë sezon, Martinez të alternohet me zviceranin Sommer për të qenë gati të bëhet titullar i padiskutueshëm sezonin e ardhshëm, atëherë kur “helveti” të ketë 37 vite mbi supe. /i.m /abcnews.al
