Gjykata e Shkallës së Parë në Tiranë ka vendosur të sekuestrojë pasuri në vlerë 3 milionë euro. Policia e Shtetit bën me dije se kjo pasuri i përket shtetasit Emiljan Burba, 54 vjeç, banues në Tiranë. Sipas të dhënave zyrtare, ky person rezulton i dënuar në Itali me 21 vjet burg për trafikim të lëndëve narkotike.
Ai u ndalua në Tiranë në vitin 2014 dhe më pas u bë ekstradimi i tij drejt Italisë për të shlyer dënimin e caktuar nga drejtësia e vendit fqinj. Përkatësisht, pasuritë e skuestruara janë dy ndërtesa (resorte), në Sarandë, 1 automjet (kamion) dhe një rimorkio.
Njoftimi i policisë:
Vijon puna për gjurmimin, identifikimin dhe sekuestrimin e pasurive që rrjedhin nga aktiviteti kriminal. Finalizohet pas një hetimi dyvjeçar, operacioni policor i koduar “Resort 2012”. Sekuestrohen pasuri që arrijnë vlerën 3 milionë euro, të cilat dyshohet se rrjedhin nga veprimtaria kriminale e një shtetasi të dënuar në Itali, me 21 vjet burgim, për trafik droge.
Në kuadër të procedimit penal për evidentimin dhe sekuestrimin e pasurive që rrjedhin nga veprimtaria kriminale, referuar nga Sektori për Hetimin e Krimit Ekonomik dhe Financiar në DVP Tiranë, nën drejtimin e Prokurorisë pranë Gjykatës së Shkallës së Parë Tiranë, pas një hetimi dyvjeçar të ndjekur me metoda proaktive, u zhvillua operacioni policor i koduar “Resort 2012”.
Në zbatim të këtij procedimi, u bë ekzekutimi i vendimit të Gjykatës së Shkallës së Parë, për vendosjen e sekuestros preventive ndaj pasurive të paluajtshme në ngarkim të shtetasit Emiljan Burba, 54 vjeç, banues në Tiranë.
Ky shtetas është ndaluar në Tiranë, në vitin 2014, dhe është ekstraduar në Itali, pasi Gjykata e Apelit në Torino, Itali, e ka dënuar me 21 vjet burgim, për trafik droge. Në zbatim të vendimit të Gjykatës u bë sekuestrimi i pasurive të paluajtshme, vlera e të cilave shkon rreth 3 milionë euro, konkretisht:
•2 ndërtesa (resorte), në Sarandë, 1 automjet (kamion) dhe 1 rimorkio. Nën drejtimin e Prokurorisë po vijon puna për të zbuluar asete të tjera që ky shtetas ose familjarët e tij mund t’i kenë regjistruar në emër të personave të tjerë./abcnews.al
