Nuk ka TikTok pa muzikë, por tani nuk ka industri muzikore pa TikTok dhe ByteDance e ka kuptuar. Kompania që zotëron platformën popullore dorëzoi dokumente në Zyrën e Patentave dhe Markave të SHBA-së për njohjen e markës tregtare për “TikTok Music” majin e kaluar, duke bërë të njëjtën gjë në Australi që nga nëntori i kaluar. Shërbimi, sipas aplikacionit, do t’u mundësojë përdoruesve të blejnë, luajnë, ndajnë dhe shkarkojnë muzikë. Ai gjithashtu do t’i lejojë ata të krijojnë, të ndajnë dhe të rekomandojnë lista për luajtje, të lënë komente për këngët siç bëjnë tani në video dhe të transmetojnë drejtpërdrejt audio dhe video.
TikTok Music nuk është përpjekja e parë e ByteDance për të krijuar një platformë transmetimi. Në vitin 2020, kompania lançoi Resso , një platformë për transmetim muzikor në Indi, Brazil dhe Indonezi. Resso kishte disa nga veçoritë që do të ketë TikTok Music dhe i merr përdoruesit përmes TikTok, që do të thotë se përdoruesit do të qëndrojnë brenda ekosistemit ByteDance.
Është e paqartë nëse ByteDance do të përdorë platformën e re brenda Resso ose do të krijojë diçka të veçantë. Në çdo rast, TikTok ka pasur një ndikim të madh në mënyrën se si funksionojnë mediat sociale dhe ka shumë të ngjarë që një platformë nga i njëjti ekosistem të bëjë të njëjtën gjë për industrinë e transmetimit të muzikës, duke detyruar platformat e tjera të përshtaten./abcnews.al
