Padyshim kur sjellim ndërmend Kombëtaren e Francës i pari emër që na vjen në mendje është “ylli” i Paris Saint-Germain, Kylian Mbappe, mirëpo tekniku Didier Deschamps ka një tjetër emër që e “mahnit”.
Bëhet fjalë për “fantazistin” e Atletico Madrid, Antoine Griezmann, për këtë fundit që nuk kanë munguar as elozhet nga tekniku i “gjelave”, i cili në fjalën e tij për mediat është shprehur se është diçka e mrekullueshme të kesh në skuadër një lojtar si “bomberi” i “Los Colchoneros”.
“Është e mrekullueshme për një skuadër të ketë në përbërje një futbollisti si ai, Antoine është një shembull i shkëlqyer. E kam shoqëruar ndër vite, në ndeshje dhe në kompeticione. Mes nesh është krijuar një marrëdhënie njerëzore e mbushur plot besim të ndërsjelltë.
E di se çfarë i detyrohem për atë që i ka dhënë skuadrës kombëtare. Askush nuk është i pazëvendësueshëm, por mund të jesh i domosdoshëm. Dhe ai e ka bërë këtë me kalimin e viteve”,- tha “numri 1” i pankinës së francezëve.
Më tej në fjalën e tij, tekniku Deschamps u rikthye pas në kohë edhe te “Topi i Artë” i vitit 2018, vit në cilin Griezmann doli i treti në renditje, pas Cristiano Ronaldo e fituesit Luka Modric, mirëpo për teknikun francez 32-vjeçari duhet të triumfonte atë sezon.
“Ai mund ta kishte fituar ‘Topin e Artë’ falë sezonit që përjetoi dhe titullit kampion bote. Do ta kishte merituar. Kur është i mbushur me besim, ai është rrezatues dhe shkëlqen. Antoine gjithashtu ka aftësi për të përcjellë shkëlqim, për atë që është dhe çfarë përfaqëson.
Ai është një forcë lëvizëse. Është dikush të cilit buzëqeshja nuk i mungon kurrë. Në aspektin njerëzor, ai është shumë i dashur. Në rast se nuk e di, ti je ende i preferuari im, Antoine”,- u shpreh trajneri i “gjelave”. /i.m /abcnews.al
