Policia italiane arrestoi në Aleksandri tre shqiptarë pasi akuzohen se kanë tentuar të vrasin me thikë një bashkëkombasin e tyre.
Ata akuzohen për tentativë vrasje, pasi në 12 nëntor të vitit të shkuar goditën disa herë me thikë duke i shkaktuar plagë të rënda një 40-vjeçari me origjinë nga Shqipëria, raporton abcnews.al.
Policia italiane dyshon se tre të rinjtë janë konfliktuar me 40-vjeçarin për shkak të problemeve në trafikun e kokainës.
Mediat italiane raportojnë se sherri mes shqiptarëve dhe plagosja e 40-vjeçarit shkaktoi një shqetësim të madh në komunitetin e zonës mbrëmjen e 12 nëntorit 2021.
Ngjarja
Sipas autoriteteve, fillimisht shqiptari 40 vjeçar është futur në banesën e të rinjve duke marrë një goditje me thikë në shpinë.
Më pas, ka marrë edhe disa të tjera në pjesët e poshtme të trupit si edhe bark, por mundi të dalë prej aty. Ai u ndoq nga të rinjtë dhe është goditur me thikë disa herë të tjera në rrugë, gjë që ka alarmuar banorët që e panë.
Mësohet se njëri prej të rinjve shqiptarë të përfshirë në ngjarje ishte arrestuar nga policia në vitin 2020 për trafik të lëndëve narkotike.
Ky i fundit njihet nga policia si një person ekstremisht i dhunshëm. /abcnews.al
