Tentoi të digjte me benzinë lokalin e biznesmenit që u plagos, arrestohet “Ujku” në Sarandë

schedule13:08 - 21 Qershor, 2021

schedule 13:08 - 21 Qershor, 2021

Një 32-vjeçar është arrestuar në flagrancë nga policia në Sarandë, pasi ka tentuar të djegë më benzinë një lokal.

I arrestuari është Luan Obzova, i njohur ndryshe me nofkën “Ujku”. Burime nga policia bëjnë me dije se ky i fundit ka tentuar të djegë lokalin e biznesmenit Spiro Iljadhi, pas plagosjes. Dyshohet se 32-vjeçari ka tentuar t’i vërë flakën lokalit për të fshehur provat.

Uniformat blu njoftojnë se në bashkëpunim me Forcat e posaçme “Shqiponjat” dhe FNSH, në vijim të kontrollit të imtësishëm të territorit, në lagjen Nr. 1, nga patrulla e Qarkullimit Rrugor është konstatuar një shtetas i cili po kryente lëvizje të dyshimta me një motomjet dhe më pas ka ndaluar pranë një lokali në këtë lagje dhe ka tentuar ta djegë me një shishe me lëndë djegëse.

Në momentin që Obzova ka vënë re patrullën ka tentuar të largohet, por është kapur dhe prangosur nga  shërbimet e Policisë.

Biznesmeni u plagos me armë zjarri përpara lokalit të tij në Sarandë. I arrestuar për këtë ngjarje është Redjan Haderi 33-vjeç, si dhe janë në kërkim dy vëllezërit Andrea dhe Visi Caushi.

Njoftimi i policisë:

Shërbimet e Komisariatit Sarandë parandalojnë një rast të tentativës për zjarrvënie të qëllimshme.

Tentoi të digjte me lëndë djegëse një biznes, arrestohet në flagrancë 32-vjeçari, person me precedent kriminal në fushën e narkotikëve.

Sekuestrohen në cilësinë e provës materiale një shishe me lëndë djegëse që ky shtetas do të përdorte për të realizuar zjarrvënien dhe motomjeti me të cilin do të largohej.

Shërbimet e Qarkullimit Rrugor, në bashkëpunim me Forcat e posaçme “Shqiponjat” dhe FNSH, në vijim të kontrollit të imtësishëm të territorit, patrullimit në të gjitha lagjet e qytetit dhe rrugicat pa ndriçim, në lagjen Nr. 1, nga patrulla e Qarkullimit Rrugor është konstatuar një shtetas i cili po kryente lëvizje të dyshimta me një motomjet dhe më pas ka ndaluar pranë një lokali në këtë lagje dhe ka tentuar ta djegë me një shishe me lëndë djegëse. Në momentin që ky shtetas ka vënë re patrullën ka tentuar të largohet, por është kapur dhe prangosur nga  shërbimet e Policisë.

Në vijim të veprimeve, nga specialistët për Hetimin e Krimit në Komisariatin e Policisë Sarandë u bë arrestimi në flagrancë, për veprën penale “Shkatërrimi i pronës me zjarr” mbetur në tentativë, i shtetasit L. O., 32 vjeç, banues në Sarandë, i dënuar më parë për veprën penale “Prodhimi dhe shitja e narkotikëve”.

Materialet iu referuan Prokurorisë pranë Gjykatës së Shkallës së Parë Sarandë, për veprime të mëtejshme hetimore.

g.v/abcnews.al