Takimi Veri-Jug, Trump mirëpret zhvillimet koreane

Presidenti amerikan Donald Trump ka mirëpritur deklaratat pozitive të bëra këtë të martë nga delegacioni koreano-jugor që ishte në Veriun fqinj. Përfaqësuesit e Seulit deklaruan se Peniani ka treguar vullnet për të pezulluar testet e raketave gjatë bisedimeve eventuale me Shtetet e Bashkuara për eleminimin e arsenalit bërthamor. Megjithatë, shefi i Shtëpisë së Bardhë ka refuzuar të thotë nëse do të ketë kushte paraprake për t’u ulur në bisedime me regjimin koreano-verior. Zhvillimet fundit vijnë pas disa muaj të mbushur me fyerje e ofendime mes Trump dhe liderit të vendit aziatik, Kim Jong un. “Kemi bërë një rrugë të gjatë me Korenë e Veriut, të paktën në retorikë. Por deklaratat që vijnë janë shumë pozitive”, tha Trump nga Dhoma Ovale, ku priti në një takim kryeministrin e Suedisë, Stefan Lofven./abcnews.al