Loading ...
Sulmet ruse me dronë ndaj pikave të karburantit në Ukrainë po bëhen gjithnjë e më të shpeshta, duke rritur rrezikun për civilët dhe duke detyruar autoritetet të marrin masa të posaçme sigurie.
“Mbushuni shpejt dhe vazhdoni rrugën”, u ka bërë thirrje drejtuesve të automjeteve kryebashkiaku i Kharkivit, Ihor Terekhov, pas sulmeve me dronë rusë ndaj dy pikave të karburantit në qytetin e dytë më të madh të Ukrainës. Sipas autoriteteve lokale, dy persona mbetën të plagosur.
Sulme të ngjashme janë regjistruar edhe në zona të tjera. Javën e kaluar, një pikë karburanti pranë Kryvyi Rih u godit, duke shkaktuar tre viktima.
Fushata ruse kundër pikave civile të karburantit është intensifikuar që prej prillit, kryesisht në rajonet pranë vijës së frontit. Sipas Oleksandr Sirenkos, analist në institutin ukrainas të energjisë Nafto Rynok, Rusia ka goditur të paktën 246 pika karburanti në Ukrainë.
Vetëm gjatë korrikut, Qendra për Rezistencën ndaj Dezinformimit verifikoi 114 sulme ruse ndaj pikave të karburantit, nga 66 të regjistruara një muaj më parë.
Për shkak të rrezikut në rritje, policia ukrainase u ka kërkuar shoferëve të largohen menjëherë nga pikat e karburantit sapo aktivizohet alarmi ajror dhe, nëse është e nevojshme, të braktisin edhe automjetet.
“Makinën mund ta riparosh, por jetën nuk mund ta kthesh”, thuhet në një apel të policisë në rajonin e Dnipropetrovskut.
Sipas Sirenkos, sulmet fillimisht kryheshin me dronë më të vegjël të komanduar nga distanca, por Rusia më pas nisi përdorimin e dronëve Shahed, të cilët janë më të mëdhenj, më të kushtueshëm dhe më shkatërrues.
Një dron Shahed vlerësohet se kushton nga 20 mijë deri në 50 mijë dollarë.
“Një pikë karburanti u godit pesë herë nga Shahedët”, ka deklaruar Sirenko. “Këta Shahedë kushtojnë më shumë se vetë pika e karburantit.”
Në disa prej rrugëve kryesore të Ukrainës nuk ka mbetur asnjë pikë karburanti funksionale. Një prej rasteve është rruga që lidh Kharkivin me Dnipron.
Në zonën përreth Opishnyas, në rajonin e Poltavës, të gjitha pikat e karburantit janë shkatërruar.
“Ju mund ta shihni strategjinë e armikut tonë. Ata duan të na privojnë nga karburanti”, tha kreu i fshatit, Mykola Riznyk. Autoritetet lokale kanë nisur të grumbullojnë karburant në sasi të vogla dhe ta shpërndajnë në vende të ndryshme, për të reduktuar rrezikun e humbjeve nga sulmet.
Në Mykolaiv, shoferja Kateryna Stokolya thotë se pikat e karburantit po ndërpresin aktivitetin sa herë që bie alarmi ajror.
“Tani të gjithë e kanë pranuar këtë. Siguria vjen e para. Nëse nuk mund të furnizohesh tani, do të furnizohesh më vonë”, është shprehur ajo.
Sipas saj, sulmet synojnë të krijojnë frikë te popullsia dhe të ushtrojnë presion mbi autoritetet ukrainase.
Në zonat e rajonit të Khersonit që kontrollohen nga Ukraina, pothuajse gjysma e pikave të karburantit kanë ndaluar së funksionuari. Pikat e mbetura, sipas zëvendësshefit të administratës rajonale, Oleksandr Tolokonnikov, sulmohen nga dronët rusë “pothuajse çdo ditë”.
Në Trostyanets, qytet me rreth 20 mijë banorë pranë kufirit me Rusinë, raportimet flasin për shkatërrimin e të gjitha pikave të karburantit. Për të garantuar furnizimin, autoritetet lokale kanë nisur të shpërndajnë karburant direkt nga autobotet, duke ndryshuar vazhdimisht vendndodhjen e tyre.
Edhe kompanitë private kanë marrë masa. Rrjeti BRSM Nafta ka humbur tetë pika karburanti dhe po rindërton dy të tjera pas sulmeve. Në disa prej pikave janë ndërtuar strehimore prej betoni dhe janë vendosur rrjeta kundër dronëve. Kompania ka shkurtuar gjithashtu oraret e punës dhe ka reduktuar numrin e punonjësve në disa pika.
“Klientët nuk shëtisin më nëpër korridore duke parë se çfarë kemi në raftet tona. Mbushin makinën dhe duan të largohen sa më shpejt të jetë e mundur”, tha Oleksandr Melnychuk, drejtues i departamentit të marketingut strategjik të kompanisë.
Pavarësisht sulmeve, deri tani ndikimi në furnizimin e përgjithshëm me karburant në Ukrainë nuk ka qenë dramatik.
Sipas një raporti të Bankës Kombëtare të Ukrainës, rreth 4% e pikave të karburantit në vend janë dëmtuar ose shkatërruar. Megjithatë, ndikimi në treg ka qenë i kufizuar, pasi shitjet në rajonet më larg vijës së frontit dhe kufirit me Rusinë kanë kompensuar një pjesë të humbjeve.
Situata është dukshëm ndryshe në Rusi, e cila është përballur me mungesa karburanti pas sulmeve ukrainase ndaj rafinerive dhe infrastrukturës së naftës.
Gazeta ruse Izvestia raportoi javën e kaluar se benzina ishte e disponueshme vetëm në 28% të pikave të karburantit në Rusi.
Ndryshe nga Rusia, Ukraina mbështetet më pak te rafineritë e mëdha dhe depot qendrore të karburantit. Një pjesë e konsiderueshme e furnizimit sigurohet përmes importeve rrugore me kamionë-cisternë.
Sipas Sirenkos, numri i madh i pikave të karburantit në Ukrainë u jep shoferëve mundësi të gjejnë alternativa edhe kur disa pika janë goditur.
“Mallkon dhe vazhdon drejt një pike tjetër karburanti. Në rregull, udhëton 10 kilometra më shumë nga sa kishe parashikuar, por kjo nuk është ndonjë problem i madh”, tha ai.
Sipas analistit, faktorë të tjerë ndërkombëtarë kanë pasur ndikim më të madh në çmimet lokale të karburantit. Ndërkohë, rezervuarët nëntokësorë të benzinës, ndër komponentët më të kushtueshëm të një pike karburanti, zakonisht kanë mbetur të padëmtuar nga sulmet ruse.
