Loading ...
20 persona janë vrarë dhe 26 të tjerë janë plagosur në një sulm me armë të ndodhur në një qendër tregtare në qytetin El Paso, në Teksas. Një 21-vjeçar hyri në qendër i pajisur me Kallashnikov dhe hapi zjarr ndaj të pranishëmve, para se të arrestohej nga policia. Guvernatori Greg Ebot e cilësoi ngjarjen si më të rëndat në historinë e Teksasit.
Ndërkohë, policia po heton nëse sulmi, që ndodhi pak kilometra larg kufirit SHBA-Meksikë ishte një krim urrejtjeje. Së bashku me FBI-në, forcat e rendit po punojnë për të verifikuar nëse një manifest i publikuar në një forum onllajn, ku thuhej se akti ishte një sulm ndaj pushtimit të komunitetit hispanik, ishte shkruar nga autori.
21-vjeçari i arrestuar është identifikuar me emrin Patrik Krusius dhe sipas mediave amerikane është një person i njohur për prirje supremaciste. Më parë ai kishte shprehur simpati për autorin e sulmit në një xhami në Kristçërç të Zelandës së Re, Brenton Tarrant, që la të vrarë 51 persona.
Ngjarja mendohet të jetë sulmi i tetë më vdekjeprurës në historinë moderne të Shteteve të Bashkuara. Në reagimin e tij, presidenti Donald Trump e cilësoi episodin një “akt burracakërie”. “Qëndroj përkrah gjithëkujt në këtë vend që dënon këtë akt të urryer. Nuk ka justifikime për vrasjen e njerëzve të pafajshëm”, tha Trump në Twitter. Qendra tregtare Uollmart ishte e mbushur me njerëz në momentin e të shtënave.
Shefi i policisë lokale, Greg Allen deklaroi se forcat e rendit nuk qëlluan as edhe një plumb për të ndaluar autorin, ndërkohë që shtoi se viktimat janë të moshave të ndryshme. Ngjarja në fjalë bëri që në mbarë Shtetet e Bashkuara të rihapet debati për kontrollin e armëve. Ajo është e dyta që ndodh në një qendër Uollmart brenda javës, pasi një ish-punonjës vrau dy ish-kolegë në degën e kompanisë në Misisipi ditën e martë./ABC News Albania 24/7
