Trajneri i Laçit, Sulejman Starova, foli pas barazimit 1-1 kundër Luftëtarit. Për këtë ndeshje, numri një i stolit kurbinas tha:
NDESHJA – “Unë nuk jam i kënaqur, pasi objektivi ishte për ta fituar takimin. Vështirësinë e dinim, luajtëm kundër një skuadre që mbrohet shumë mirë. Fakti që ata shënuan të parët, nga një gabim i yni, na e vështirësoi punën. Pjesa e dytë ishte monolog, me vetëm një skuadër që luante futboll. Në 2-3 minutat e fundit, i bëmë të gjitha përpjekjet. Luajtëm me pesë sulmues, kundërshtari ka meritat e veta. Kjo gjë bëri që ne të mos marrim fitoren sot”.
REZULTATET – “Nuk kemi asnjë lloj krize. Nuk e di pse thoni kështu. Skuadra ka luajtur shumë mirë, por sot sulmi nuk dha më të mirën, ashtu si në Vlorë. Ne i kemi të gjitha mundësitë për të ecur përpara. Nëse e keni parë ekipin gjatë gjithë kohës, nuk është në krizë. Luajmë shumë mirë futboll dhe duhet të ishim shumë më lart në renditje. Nuk ka krizë!”.
STRATEGJIA – “Jam një trajner si gjithë të tjerët. Kur topin e ka kundërshtari, marr masat për t’u mbrojtur mirë dhe për ta fituar sa më shpejt. Gjëja që rregullohet më shpejt është aspekti difensiv. Edhe sot, me një gabim, e vështirësuam shumë lojën. Kur një skuadër që mbrohet me shumë forca kalon në avantazh, është shumë vështirë ta përmbysësh”, tha Starova për Supersport./abcnews.al
