Nga Spartak Ngjela
Për ligjin e dekriminalizimit. Po ka shumë abuzime në lidhje me faktin nëse ligji i dekriminalizimit vepron dhe kundër personave të akuzuar për krime të kryera, veç Shqipërisë, edhe në Shtetet e Bashkuara apo në një nga shtetet e Bashkimit Evropian.
Pika 2 e nenit 2 të ligjit “Për dekriminalizimin”, nuk i lejon të kandidojnë për deputet, dhe ja si shprehet: Nuk mund të kandidojnë dhe as të zgjidhen deputetë në Kuvendin e Shqipërisë, kryetar bashkie apo këshilltar në këshillin bashkiak…
Ata që janë dënuar me një vendim jo përfundimtar nga një autoritet gjyqësor të një vendi të BE-së, SHBA-së, Kanadasë, Australisë, apo për të cilët është vendosur masë sigurimi personal, ose është lëshuar një urdhër kërkimi ndërkombëtar nga autoritetet e këtyre shteteve, për kryerjen apo tentativën e kryerjes së veprave penale të parashikuara në pikën 1 “a” të këtij neni…
Ata që janë dëbuar nga territori i një shteti anëtar i BE-së, SHBA-së, Kanadasë, Australisë për një nga krimet e parashikuar në këtë nen, ose që janë dëbuar për cënim shumë të rëndë dhe serioz të sigurisë publike të shtetit përkatës.
Ja, ky është neni ndalues i ligjit. Në fakt, kjo është gjëma e të inkriminuarve. Po dëgjoj se thonë nëpër studio që nuk ka ligj për këta… Të jenë të gjithë të qetë. Ky është neni.
Mendoj se ky nen duhet të zbatohet rigorozisht. Dhe do të zbatohet… Të presim dhe të shikojmë… shpëtimin e shqiptarëve nga krimi që po sundon me dekada mbi jetën e tyre.
