Anglia mposhti Kroacinë në ndeshjen hapëse të tyre në EURO 2020 dhe normalisht trajneri Gareth Southgate është i kënaqur, sidomos pasi skuadra e tij bëri edhe një paraqitje të mirë. “Ndihem shumë që kemi qenë në gjendje t’i dërgojmë tifozët në shtëpi të lumtur dhe të kemi tifozët kudo të gëzuar. Jam i kënaqur në lidhje me lojën që bëri skuadra.
Kishim lojtarë të rinj, si dhe me eksperiencë, kurse kundërshtari nuk ishte i lehtë. Gjithashtu ishte një ditë e nxehtë. Kishte shumë arsye të ishim nervozë në fillim, por djemtë u vendosën mirë në fushë. Luajtëm mirë me dhe pa top, bëmë çfarë deshëm në aspektin e presingut”, tha trajneri i “Tre Luanëve”.
“Euforia? Kjo është sfida e madhe tani, sepse sigurisht që jemi të gëzuar nga fitorja dhe lojtarët janë të lumtur. Ishte një hap pozitiv për kualifikimin, por sfida më e madhe është të ulesh me këmbë në tokë para sfidës së radhës. Duhet të sigurohemi që jemi gati për ndeshjen me Skocinë, pasi do të jetë një sfidë e madhe. Ta shijojmë këtë fitore sonte dhe të përqendrohemi te ndeshja tjetër.
Objektivi ynë i parë është kualifikimi. Nuk e kemi bërë ende dhe kemi një ndeshje shumë të rëndësishme për ne dhe tifozët të premten në mbrëmje. Mendoj se presioni është ai që ne vendosim të jetë. Kemi folur rreth kësaj si grup. Kemi mundësinë të jemi të parët të bëjmë gjëra.
Nuk e dija se sot ishte fitorja e parë e Anglisë në një ndeshje hapëse. Kështu djemtë kanë arritur diçka që të tjerët nuk e kanë bërë. Ne jemi të fokusuar ku duam të shkojmë, të punojmë si grup, duke u bazuar te lojërat dhe stërvitjet. Është e shkëlqyeshme t’u japim gëzim njerëzve. Tani ne po përgatitemi për një ndeshje të vështirë të premten”, përfundon Southgate. /abcnews.al
