Dy të arrestuarit për vrasjen e vëllezërve Bilali në Shkodër do të qëndrojnë në burg. Para trupit gjykues ata e kanë pranuar se makinën që ka shërbyer për të kryer krimin e kishin lyer, por se nuk kanë lidhje me vrasjen e Bilalëve.
“Me Ibrahim Licin jemi kushëri nga nëna”, ka thënë njëri nga të arrestuarit për vrasjen e vëllezërve Bilali, Arsen Stojku.
Kurse bashkë me Mislim Ramën thanë para gjykatës se makinën e vjedhur e kishin lyer por nuk janë ata vrasësit e Bilalëve.
Avokatët e tyre kërkuan lehtësime, por Gjykata caktoi të njëjtën masë sigurie që kishte kërkuar edhe prokuroria.
Rama dhe Stojku u arrestuan si pjesmarrës në atentatin ndaj Astrit dhe Ibrahim Bilalit, në 30 Mars në Kiras të Shkodrës.
Ndërkohë njëri nga personat e dyshuar si autori kryesor i ngjarjes, Ibrahim Lici është ende në arrati, i shpallur në kërkim.
Atentati ndaj vëllezërve Astrit dhe Ibrahim Bilali një muaj më parë ishte nga më të bujshmit në qytetin verior. Dy burrat ishin duke shkuar te motra e tyre kur mbi ta u qëllua me breshëri, pa pasur asnjë mundësi shpëtimi. Makina e autorëve rezultoi e vjedhur më parë në lagjen Perash.
Pas ngjarjes ajo u gjet gjysëm e djegur vetëm 300 metra larg vendit të ngjarjes. Dyshimet e deritanshme mbi motivin e ngjarjes flasin për një hakmarrje që ka lindur pas vrasjes së Fatbardh Licit.
Në këtë ngjarje u përfol si i përfshirë emri i ish-boksierit Asmer Bilali, djali i Astrit Bilalit./abcnews.al
