Manchester United fitoi 04 takimin e parë ndaj Real Sociedad dhe kualifikimin në raundin e 1/8 është një çështje e mbyllur, edhe pse futbolli nuk rresht kurrë së surprizuari. Kohë për festë nuk ka për “Djajtë e Kuq”, të cilët kthehen në fushë të dielën në mbrëmje (20:00). Përballë do të kenë Newcastle në “Old Trafford”.
Diferenca me Manchester City e vendit të parë është 10 pikë, por Ole Gunnar Solskjaer beson akoma te titulli. Trajneri norvegjez ndalet edhe te Edinson Cavani në prononcimin e tij, duke shprehur hapur dëshirën për të rinovuar me sulmuesin nga Uruguai. “El Matador”, i cili qëndron jashtë për momentin për shkak të një problemi muskulor, u transferua si lojtar i lirë tek United këtë sezon dhe deri tani ia ka dalë të shënoj 7 gola.
TITULLI – “Nuk mund ta mohojmë që forma jonë ka rënë disi në ndeshjet e fundit të kampionatit. Kemi gabuar kemi lënë disa pikë krejt kot. Nuk e besoj se jemi jashtë garës për titullin, nuk jemi dorëzuar akoma. Sigurisht që synojmë t’i fitojmë të gjithë ndeshjet, por nuk mund të kontrollojmë atë që bëjnë skuadrat e tjera”.
CAVANI – “Di të them që Edinson po paraqitet shumë mirë me ne. Më ka impresionuar, teksa ai është përshtatur për mrekulli me grupin. Do të ulemi me të dhe do të bisedojmë në lidhje me rinovimin. Duhet të mësojmë edhe planet e tij, normale. Ne jemi shumë të kënaqur me rendimentin e Cavanit dhe me atë që po bën në fushë”. /abcnews.al
