Detaje të reja kanë dalë nga asfiksimi i punonjësve të fabrikës së kompanisë Jura në Fier, e cila merret me prodhimin e sistemit elektrik dhe të pjesëve automobilistike.
Shtatë punonjës kanë pësuar skuqje dhe acarim të lëkurës gjatë procesit të punës dhe u dërguan me urgjencë në spitalin e Fierit. Shkak dyshohet të jetë bërë një reaksion mes kimikateve që perdoren për pajisjet e makinave. Burime nga spitali thonë se gjendja e punonjësve është e qendrueshme dhe nuk ka rrezik për jetën e tyre.
Fillimisht pasi kanë parë kolegët që shfaqen probleme shëndetësore punonjësit e fabrikës janë përfshirë nga paniku, por me sqarimin e gjendjes shëndetësore të grave që shkuan në spital, janë qetësuar dhe punonjësit e tjerë.
Njoftimi i Policisë:
Rreth orës 20:30, disa punonjëse të një kompanie për prodhimin e sistemit elektrik dhe të pjesëve automobilistike, kanë shfaqur probleme shëndetësore dhe kanë kërkuar ndihmë mjekësore.
7 prej tyre kanë marrë ndihmën e parë në ambientet e kompanisë, dhe janë larguar në banesë, ndërsa njëra prej tyre vijon të marrë ndihmën mjekësore në spital, ku ndodhet jashtë rrezikut për jetën.
Grupi hetimor po punon për përcaktimin e shkakut dhe dokumentimin e plotë ligjor të ngjarjes./abcnews.al
