Një ditë pas tensioneve të regjistruara në veri të Kosovës, ABC News sjell situatën nga Leposaviqi, ku ende ka prani të forcave policore.
Gazetarja Linda Karadaku në një lidhje të drejtpërdrejtë nga Leposaviqi është shprehur se brenda objektit është future kryetari i zgjedhur Lulzim Hetemi dhe duket se ndodhet në zyrën e tij ku çdo gjë për momentin është nën ruajtjen e policisë.
Ndër të tjera gazetarja raporton se për shkak të tensioneve të një dite më parë vijon që të ketë probleme me valët e telefonit në këto komuna.
Sipas gazetares së ABC News në lokalet dhe kafen që ndodhen në qendër të Leposaviqit ndodhen grupe të rinjsh të cilët duket se presin rënien e sirenës për tu grupuar në proteste. Gjatë raportimit të gazetares një nga të rinjtë që qëndronte në kafe ka përshëndetur me shenjën e shqiponjës.
Ndërkaq në këtë komunë pas shumë vitesh tashmë valëvitet flamuri i Kosovës.
Ndërkohë mësohet se në Mitrovicë pas tensioneve të një dite më parë ka shkuar edhe i dërguari special i Gjermanisë, i cili pritet që të japë dhe një prononcim më pas në lidhje me këtë situatë.
Sipas gazetares së ABC News në Veri, është një situatë shah mat, problem nëse vijon siç është dhe problem rikthimi pas. Më problematike pritet që të jetë dita e dielë në darkë dhe e hena ku pritet që kryetarët të rikthehen në krye të detyrës. /abcnews.al
