Nga Ema Shazivari
Pavarësisht se nga data 15 janari urgjencat e Tiranës por edhe ato të rretheve referohen tek “Shefqet Ndroqi”, kjo e enjte në spitalin Infektiv ka pasur shumë lëvizje autoambulancash.
Por pavarësisht rritjes që kanë pësuar infektimet ditore, numri i pacientëve në spitale mbetet i qëndrueshëm.
Në 24 orët e fundit, në infektiv janë shtruar 15 qytetarë, kryesisht nga jugu. Në muajin nëntor që përkon me kulmin e valës së dytë, në këtë spital shtroheshin deri në 30 persona në ditë.
Por të shumtë janë dhe ata që shërohen nga ky virus.
Siç duket edhe nga pamjet, ky i moshuar ia ka dalë të fitojë këtë betejë. Pasi del nga urgjenca, falenderimin e fundit e ka për mjeken dhe infermieren që e shoqëronte.
I buzëqeshur, hipën në ambulancë por kësaj here për t’u rikthyer shëndosh e mirë në banesën e tij.
Sipas raportimeve të fundit nga ministria e shëndetësisë, aktualisht në të 4 spitalet COVID po trajtohen 280 pacientë. /abcnews.al/
