Si u bë Mariupoli qendra e një shpërthimi të mundshëm të kolerës?

Pas shkatërrimit nga lufta, qyteti ukrainas Mariupoli rrezikohet nga shpërthimi i kolerës. Nënkryetari i bashkisë së Mariupolit ka deklaruar se kushtet shëndetësore në qytetin e pushtuar ukrainas po përkeqësohen, sipas BBC.

Por si ndodhi?

Qyteti port në jug të Ukrainës ra në duart e forcave ruse muajin e kaluar, pas një beteje të gjatë që përfundoi me dorëzimin e luftëtarëve ukrainas në fabrikën e çelikut Azovstal. Sipas zyrtarëve ukrainas, dhjetëra mijëra njerëz, përfshirë fëmijë, mund të jenë vrarë në Mariupol.

Dhe më shumë se 1000 ushtarë ukrainas të kapur rob thuhet se janë transferuar në Rusi. Moska pretendoi në maj se gjithsej 2,439 luftëtarë nga fabrika e çelikut ishin dorëzuar. Mariupol ishte vendi ku britanikët Aiden Aslin dhe Shaun Pinner dhe shtetasi maroken Brahim Saaudun po luftonin në krah të ushtrisë ukrainase. Ata u dënuan dje me vdekje nga një gjykatë pro-ruse, raportona abcnews.al.

Pra, pse kjo ka çuar në rrezikun e përhapjes së kolerës?

Muajin e kaluar, kreu i Republikës së vetëshpallur Popullore të Donetskut tha se 60% e ndërtesave në Mariupol ishin shkatërruar, nga të cilat 20% nuk mund të rindërtoheshin.

Por nënkryetari i bashkisë Serhiy Orlov tha se 100,000 banorë janë ende të bllokuar.

Bisedat për një shpërthim të mundshëm të kolerës në qytet janë përhapur edhe më shumë gjatë ditëve të fundit, për shkak se shumë trupa janë ende të varrosur në rrënoja, dhe ujërat e zeza thuhet se kanë kontaminuar zinxhirët kryesorë të furnizimit me ujë.

Petro Andryushchenko, një këshilltar i kryebashkiakut të qytetit tha se situata humanitare në Mariupol po përkeqësohej për shkak të mungesës së ushqimit dhe ujit, dhe vuri në dukje se izolimi ishte mënyra “më cinike” për të trajtuar çdo epidemi.

Në një postim në Telegram të mërkurën ai tha se qindra trupa ishin gjetur nga forcat pushtuese ruse në rrënojat e ndërtesave të shkatërruara në Mariupol, duke e përshkruar situatën si një “karvan të pafund vdekjeje”.