Këshilltari diplomatik i Giorgia Meloni, Francesco Talo, dha dorëheqjen pas shakave të dy aktorëve të humorit rusë, Bovan dhe Lexus. Sipas kryeministres italiane, dorëheqja është pranuar.
Talo mori përgjegjësinë për mungesën e kontrolleve që bëri të mundur telefonatën e dy rusëve me Giorgia Meloni gjatë së cilës lufta në Ukrainë ishte në qendër të vëmendjes.
“Rasti nuk është trajtuar siç duhet, ka pasur një mendjelehtësi relative. Kur më dërgohet një telefonatë nga këshilltari, e konsideroj të vlefshme”, tha Meloni.
Në të njëjtën kohë ajo shtoi se “gjatë këtij komunikimi telefonik kam pasur disa dyshime, veçanërisht në lidhje me referenca për nacionalizmin ukrainas dhe kam njoftuar këshilltarin tim diplomatik, por më pas nuk janë kryer verifikimet e nevojshme”.
Si ndodhi telefonata
Duke u paraqitur si politikanë të rangut të lartë nga një vend afrikan, dy komedianët rusë u ankuan se Afrika nuk mund të kërkojë ndihmë nga organizatat evropiane, sepse “të gjitha paratë e BE-së shkojnë në Ukrainë”.
Meloni u pajtua dhe komentoi se “problemi është gjetja e një zgjidhjeje të pranueshme nga të dyja palët, pa shkelur të drejtën ndërkombëtare. Unë kam disa ide se si ta trajtoj këtë situatë, por jam duke pritur kohën e duhur për t’i paraqitur këto ide.”
Sa i përket kundërofensivës ukrainase, Meloni pranon se “ndoshta nuk po shkon siç pritej” dhe se po shkakton kriza të ndryshme, “duke përfshirë emigracionin, inflacionin dhe një rritje të çmimeve të energjisë”.
“Kjo nuk e ndryshoi fatin e konfliktit,” tha ajo. “Të gjithë e kuptojnë se konflikti mund të vazhdojë për shumë vite nëse ne nuk përpiqemi të gjejmë një rrugëdalje. Problemi është se cila zgjidhje është e pranueshme për të dy pa hapur konflikte të reja. Ti e di se çfarë mendoj unë për Libinë … Mund të diskutonim për orë të tëra, miku im, çfarë ndodhi. Ndoshta dikush e kupton se situata atje nuk është më e mirë tani”.
Kryeministrja u ankua edhe për fluksin e vazhdueshëm të emigrantëve afrikanë. “Situata është mjaft e ndërlikuar: që nga fillimi i vitit, më shumë se 120 mijë njerëz kanë mbërritur, veçanërisht nga Tunizia. Situata është shumë e vështirë në të gjitha frontet, situata humanitare, situata logjistike, situata e sigurisë. Dhe unë mendoj se kjo rrjedhë mund të rritet për shkak të situatës që po zhvillohet në Afrikë, veçanërisht në Sahel”.
Më pas Meloni kishte fjalë të ashpra për inercinë e kolegëve të saj të BE-së: “Për një kohë të gjatë Evropa mendonte se mund ta zgjidhte problemin duke e lënë të qetë Italinë. Ajo që ata nuk kuptojnë është se është e pamundur. Përmasat e këtij fenomeni prekin, për mendimin tim, jo vetëm Bashkimin Evropian, por edhe Kombet e Bashkuara. Por problemi është se të tjerëve nuk u intereson. Ata nuk u përgjigjën në telefon kur i thirra. Dhe të gjithë janë dakord që Italia duhet ta zgjidhë e vetme këtë problem.”
Italian Prime Minister admits that European leaders are tired of the Ukraine war and need a way out.
Another excellent political prank by Vovan and Lexus. Follow them here: @evilprank pic.twitter.com/H3Fu4S72Uu
— Kim Dotcom (@KimDotcom) November 2, 2023
