Loading ...Pas suksesit të librit “Shqipëria në Pallat”, gazetarja Valbona Sulçe vjen me një rrëfim të ri letrar dhe social: “Shqipëria në avionin e Londrës – Rrëfenja të vogla”, një libër që vjen pas një dekade reflektimi mbi transformimet e Shqipërisë dhe shqiptarëve.
Në studion e ABC e Mëngjesit, Sulçe tregoi se ky libër është një vazhdim i një bisede të nisur 10 vite më parë, por këtë herë me një këndvështrim tjetër: Shqipërinë e parë nga larg, jashtë kufijve, përmes historive të vogla që flasin për ndryshime të mëdha.
“Ky është një libër për ata që duan të rrinë larg ekranit dhe kronikës së zezë. Një kujtesë se gazetaria mund të bëhet kudo, edhe kur nuk je pjesë e një redaksie,” u shpreh gazetarja.
Në faqet e librit pasqyrohen ngjarje që kanë shënjuar një dekadë të tërë: nga tërmeti tragjik, reforma në drejtësi dhe pandemia e COVID-19, te turizmi, emigracioni dhe shpopullimi i vendit.
Për Sulçen, libri është vetë “redaksia” e saj, sepse përmbledh histori që i kemi jetuar të gjithë si shoqëri. Titulli, sipas saj, nuk është rastësor: ai fton lexuesin të shohë Shqipërinë me një sy tjetër, nga distanca, për të kuptuar më mirë se sa shumë kemi ndryshuar në këto 10 vite.
