Rritja e investimeve në sektorin e turizmit i shton institucioneve përgjegjësinë për rritjen e numrit të turistëve që vizitojnë Shqipërinë. Ministri i Mjedisit dhe Turizmit Blendi Klosi e bëri këtë deklaratë nga Berlini ku mori pjesë në Panairin Ndërkombëtar të Turizmit.
Mes 180 shteteve pjesëmarrëse në Panairin Ndërkombëtar të Turizmit në Berlin dhe Shqipëria ka stendën e saj. Potencialet turistike të vendit tonë operatorëve nga e gjithë bota iu prezantuan nga ministri i Mjedisit dhe Turizmit Blendi Klosi. Turizmi përgjatë gjithë vitit është një mundësi e mirë theksoi ministri Klosi për t’u bërë pjesë jo vetëm e tregut ballkanik, por dhe atij europian.
Investimet në hoteleri nga sipërmarrës vendas dhe të huaj sipas ministrit Klosi shtojnë përgjegjësinë e institucioneve dhe tur operatoreve për t’u angazhuar më tepër në rritjen e numrit të turistëve që vizitojnë Shqipërinë. /abcnews.al
