Loading ...
Kombëtarja e Shqipërisë mësohet me humbjet. E katërta radhazi dhe e dyta në po aq ndeshje të Rolando Maran në pankinën kuqezi. Tablloja bëhet akoma më negative, nëse llogarit që dy disfatat e fundit erdhën në shtëpi, në fillim ndaj Izraeli dhe tani ndaj një rivali si Luksemburgu, që në “Air Albania” imponoi rezultatin 1-0. Ky fakt zbeh edhe alibinë, që ishte një ndeshje miqësore, pasi përveç rezultatit nën akuzë është e gjithë paraqitja e skuadrës kuqezi.
Kjo gjuatje e Qazim Laçit pa u mbushur katër minutat e para të sfidës ishte nje nisje e mirë për kuqezinjtë.
Mesfushori provoi serish në minutën e shtatë, pas shërbimit të mirë të Bajaramit nga e djathta, por sërish pa sukses.
Këto dy tentativa të shpejta i dhanë një pritshmëri të gënjeshtërt ndeshjes, pasi vetëm një minutë më pas, Luksemburgu goditi me golin e epërsisë, të shënuar nga një lojtar me origjinë shqiptare si Daniel Sinani. Ai bëri punën e tij, ndërsa nën akuzë e gjithë manovra mbrojtëse e Shqipërisë.
Maran provon t;i japë zëmer të besuarve të tij, që ashtu si në miqësoren e tre ditëve më parë kundër Izraelit i duhet kohë për të hyrë në taktikat e reja.
Kur arritën ta bëjnë këtë, kuqezinjtë u spostuan në gjysmëfushën kundërshtare në minutat e mbetura të pjesës së parë.
Por aksionet janë të rrëmujshëm. Asllani provoi ta zgjidhjte këtë ngërç me një goditje nga distanca në minutën e 19-të, ndërsa rasti i fundit për shënim i vjen Gjimshitit vetëm pak përpara pushimit. Por edhe mbrojtësi nuk arrin të devijojë si duhet, duke lënë në fuqi epërsinë minimale të miqve.
Fraksioni i dytë nis me zëvendësime për Shqipërinë, me Maran që hedh në fushë Seferin, Shpendin, Ajetin dhe Shehun, për Pllanën, Ramadanin, Laçin dhe Bajramin.
Kuqezinjtë e nisin në sulm, por sërish nuk arrijnë të gjëjnë goditjen e duhur. Por loja ofensive le gropa në mbrojtjen e Shqipërisë dhe Luksemburgu ka shanset e mira për të dhënë goditjen e “Nok aut”.
Për fat të mirë, Sherri është në lartësinë e duhur dhe mban në lojë Shqipërinë.
Maran bën edhe lëvizjet e fundit, duke hedhur në fushë, në fillim Brojën dhe Pajazitin dhe më pas edhe Dakun.
Me ta, sulmi duket sikur funksion më mirë, por goli mbetet tabu për kuqezinjtë. Luksemburgu mbrohet mirë, por është i rrezikshëm sa herë shfaqet përpara Sherrit.
Të kota rezultuan edhe tentativat e fundit të kuqezinjven në limitet e shtesës, që nuk evituan humbjen e radhës. Një tjetër goditje e rëndë për Kombëtaren e Shqipërisë, që me rezultate dhe lojë duket shumë larg kohëve të lavdishme dhe objektivave të vendosura me uljen në pankinë të Rolando Maran.
