Teuta është gati! Durrsakët do të përballen në mbrëmje, prej orës 19:00, me moldavët e Sheriff Tiraspol në turin e parë të Champions League.
“Djemtë e detit” do të bëjnë maksimumin të marrin një rezultat pozitiv në duelin e sotëm dhe më pas të tentojnë kalimin e turit, ndaj një rivali që në letër dhe në financa është më larta.
Gjithsesi fusha është ajo që vendos dhe durrsakët do tentojnë të befasojnë, sikurse bënë një vit më parë kur eliminuan Beitar Jerusalem që konsiderohej favorit absolut.
Trajneri Edi Martini ka menduar për formacionin dhe Frashëri në portë e katërshja e mbrojtjes janë e zakonshmja, që e shpalli Teutën kampionë në Superiore sezonin e shkuar.
Në mesfushë u besohet muskujve të Aleksit dhe Vilës, dy lojtarë që vrapojnë shumë. Këtë cilësi e kanë edhe lojtarë të tjerë, si Seferi e Lorenco Vila, kurse nga Bregu e Kallaku pritet fantazi dhe zgjidhje e situata në sulm.
Teuta, formacioni i mundshëm: Frashëri, Todorovski, Hoxha, Arapi, Jackson, Aleksi, E. Vila, Kallaku, L. Vila, Bregu, Seferi. Trajner: Edi Martini
/abcnews.al
