Njeriu gjithmonë dëshiron atë që nuk mund ta ketë. Por kur “Lonely Planet” i jep titullin “qyteti më i mirë për t’u vizituar” një qyteti që askush nuk mund ta vizitojë është një moment që tregon në mënyrë të përsosur epokën absurde që jetojmë në pandemi.
Auckland, Zelanda e Re është në një bllokim të nivelit 3, që do të thotë se kushdo që përpiqet ta vizitojë rrezikon një gjobë të lartë apo edhe burgim. E megjithatë, sipas “Lonely Planet”, është qyteti më i mirë për t’u vizituar.
“Auckland është si një planet i vetmuar në izolim të nivelit 3. Ndoshta do të thotë se pjesa tjetër e botës është në një situatë vërtetë të keqe” shkroi një banor i qytetit në rrjetet sociale.
Sigurisht që ka një shpjegim: Lonely Planet ka zgjedhur qytetet më të mira për t’u vizituar në vitin 2022, ndaj është e sigurt që diku në vitin e ardhshëm, Auckland (si shumica e destinacioneve në botë) do të jetë i hapur për vizitorët.
Sidoqoftë, për momentin, restorantet, dyqanet dhe kafenetë në Auckland janë të mbyllura dhe tubimet janë të ndaluara. Hyrja në qytet është e ndaluar edhe për vizitorët nga pjesë të tjera të Zelandës së Re.
Sa për turistët që do të donin të vizitonin vendin, me siguri do të duhet të presin edhe disa muaj. Për momentin, Zelanda e Re është e hapur vetëm për qytetarët, banorët e përhershëm dhe mbajtësit e vizave speciale për punëtorët që konsiderohen të nevojshëm.
Por edhe ata duhet të izolohen në ambiente të veçanta karantine, ku lista e pritjes i kalon 30 mijë persona.
Megjithatë, kjo nuk është hera e parë që Auckland renditet ndër qytetet më të mira në botë. Në qershor, Wellington dhe Auckland kryesuan listën e qyteteve më të mira për të jetuar.
Sipas Lonely Planet, 10 qytetet më të mira për t’u vizituar në 2022:
Auckland, Zelanda e Re
Taipei, Tajvan
Freiberg, Gjermani
Atlanta, SHBA
Lagos, Nigeri
Nikosia, Qipro
Dublin, Irlandë
Merida, Meksikë
Firence, Itali
Gyeongju, Koreja e Jugut
10 vendet më të mira për t’u vizituar në 2022:
Ishujt Kuk
Norvegjia
Mauritius
Belize
Sllovenia
Anguilla
Oman
Nepal
Malavi
Egjipt
/ Abcnews.al
