Studiuesit në Institutin Max Planck për Psikolinguistikën në Holandë kanë sugjeruar se tundja e bishtit të qenit mund të jetë bërë e zakonshme gjatë zbutjes së qenit, sepse njerëzit reagojnë pozitivisht ndaj ritmit.
Gjatë shumë viteve të hulumtimit të sjelljes së qenve, teoritë për tundjen e bishtit të tyre ishin të ndryshme: nga shprehja e lumturisë ose agresionit deri te zbutja e paraardhësve më socialë të qenve të sotëm, të cilët mësuan të njihnin reagimet njerëzore dhe silleshin në përputhje me rrethanat.
Për shembull, disa nga hipotezat përfshinin që qentë tundin në të djathtë në përgjigje të përvojave pozitive, të tilla si ndërveprimi me pronarin e tyre, dhe në të majtë kur duan të tërhiqen ose në situata potencialisht agresive.
Shkencëtarja Silvia Leonetti nga Instituti Max Planck për Psikolinguistikë paraqiti një teori tjetër, shkruan BBC.
“Hipoteza e re nënkupton që njerëzit në mënyrë të vetëdijshme ose të pavetëdijshme zgjodhën disa paraardhës të qenve që tundin bishtin gjatë procesit të zbutjes sepse ne jemi të tërhequr nga stimujt ritmikë”, tha Leonetti.
Dr. Holly Ruth Gutteridge, një studiuese e sjelljes së qenve në Universitetin e Lincoln, tha se tundja e bishtit është një sinjal social që qentë janë përshtatur për të ndërvepruar me njerëzit, sepse lehja na duket irrituese, shkruan BBC.
“Ne jemi një specie shumë vizuale dhe vlerësojmë ritmin, është një mendim interesant për t’u eksploruar, megjithëse nuk jam e sigurt se vërtet i përgjigjemi kaq shumë”, shtoi Gutteridge./abcnews.al
