Shembet ndërtesa në Liban, shkon në 13 numri i viktimave

Numri i viktimave nga shembja e një ndërtese banimi në qytetin verior libanez të Tripolit ka shkuar në 13, ndërsa ekipet e shpëtimit vijojnë kërkimet për persona të tjerë që dyshohet se ndodhen ende nën rrënoja, raportoi të hënën Agjencia Kombëtare e Lajmeve e Libanit (NNA).

Sipas autoriteteve, ekipet e emergjencës kanë shpëtuar nëntë persona në lagjen Bab al-Tabbaneh, ndërkohë që operacionet e kërkim-shpëtimit vazhdojnë për të gjetur të mbijetuar ose viktima të tjera.

Zyrtarët njoftuan se dy ndërtesa ngjitur me njëra-tjetrën janë shembur. Kreu i këshillit bashkiak të Tripolit, Abdel Hamid Karameh, tha se nuk mund të konfirmojë ende numrin e saktë të personave të zhdukur. Më herët, drejtori i shërbimit të mbrojtjes civile kishte deklaruar se në dy ndërtesat jetonin gjithsej 22 banorë.

Në javët e fundit, disa ndërtesa të vjetra banimi janë shembur në Tripoli, qyteti i dytë më i madh i Libanit, duke nxjerrë në pah gjendjen e rëndë të infrastrukturës dhe vitet e neglizhencës.  / abcnews.al /