Ligjvënësit amerikanë janë duke përgatitur legjislacionin që do t’i hapë rrugën SHBA-së që t’i sigurojë Izraelit bomba që mund të godasin objektet bërthamore nëntokësore të Iranit, raporton Politico.
Legjislacioni, i propozuar nga Josh Gottheimer (DN.J.) dhe Brian Mast (R-Fla.), do të bënte të mundur që SHBA-ja t’i dërgonte Izraelit bombën me peshë prej 30,000 paund, si një mbrojtje kundër Iranit.
Sipas projektligjit Pentagoni duhet të konsultohet me Izraelin dhe t’i raportojë Kongresit mbi aftësinë e tij për të parandaluar “një gamë të plotë kërcënimesh”, përfshirë edhe faktin nëse kjo do të rriste sigurinë e SHBA-së dhe Izraelit.
Lajmi për legjislacionin u raportua fillimisht nga Jewish Insider .
Ky vendim nga Gottheimer dhe Mast erdhi ndërkohë që ligjvënësit nga të dyja palët kanë shprehur shqetësimin në lidhje me shitjen e mundshme të avionëve ushtarakë F-35 në Emiratet e Bashkuara Arabe, të cilat ranë dakord për ndërmjetësimin e marrëdhënieve diplomatike me Izraelin muajin e kaluar.
Ligjvënësit kanë kërkuar të hedhin hapat në një marrëveshje të tillë, në mënyrë që Izraeli të ketë pajisjen më të mirë ushtarake në Lindjen e Mesme.
Edhe Izraeli nga ana tjetër ka rënë dakord të lejojë SHBA-në të shesë “armë të caktuara” në Emiratet e Bashkuara Arabe. Kjo ka të ngjarë të hapë dyert për shitje të F-35 – pasi Sekretari i Mbrojtjes Mark Esper dhe Ministri i Mbrojtjes i Izraelit Benny Gantz arritën një marrëveshje javën e kaluar për të lejuar eksportimin e armëve.
Armatimi i Izraelit me bomba të këtij niveli ka qenë një temë debati në vitet e fundit. Tensionet midis SHBA-së dhe Iranit u ndezën në rajon pasi administrata e Trump u tërhoq nga një marrëveshje që kufizonte programin bërthamor të Teheranit dhe një seri provokimesh në Lindjen e Mesme, duke përfshirë vrasjen e komandantit ushtarak iranian Qassem Soleimani dhe sulmin me raketë nga Irani kundër bazave të trupave amerikane në Irak. s.ba/abcnews.al
