Administrata amerikane ka vendosur të hënën sanksione të reja ndaj Rusisë, duke penalizuar individë dhe kompani që kanë ndihmuar Kremlinin në kryerjen e sulmeve kibernetike ndaj Shteteve të Bashkuara.
Departamenti amerikan i Thesarit ka sanksionuar të hënën 3 individë dhe 5 kompani ruse, të akuzuara se kanë bashkëpunuar me shërbimet sekrete ruse për të kryer sulme kibernetike ndaj Shteteve të Bashkuara. Në një deklaratë për shtyp, sekretari Steven Mnuchin ka bërë me dije se administrata do të vazhdojë të godasë aktorët e ndryshëm që veprojnë për llogari të Kremlinit.
Sipas tij, subjektet e sanksionuara kanë kontribuuar në mënyrë direkte në përmirësimin e kapaciteteve kibernetike dhe nënujore të Rusisë, duke vënë në rrezik sigurinë e Amerikës dhe aleatëve të saj. Sanksionet e reja parashikojnë bllokimin e pronave në juridiksionin amerikan të individëve dhe kompanive, si dhe ndalojnë shtetasit amerikanë të kryejnë transaksione me to.
Sipas Departamentit të Thesarit, Rusia ka vijuar aktivitetet kibernetike dhe i ka zgjeruar ato në Europë, Azi dhe kontinente të tjera. Në shkurt, Shtëpia e Bardhë fajësoi Kremlinin për një sulm informatik për destabilizimin e Ukrainës, që shkaktoi miliarda dollarë dëme.
Sulmi në fjalë vuri në shënjestër edhe kompanitë amerikane të furnizimit me energji dhe me internet. Nga Moska ndërkohë nuk ka patur asnjë reagim. /abcnews.al
