Entuziazmi i Sali Berishës për fitoren e Donald Trump po shuhet çdo ditë edhe më shumë.
Jo vetëm që nuk ka heqje të non gratave por Shtetet e Bashkuara të Amerikës mbeten të përkushtuara për të luftuar korrupsionin ndër radhët e zyrtarëve të lartë në mbarë botën.
Ky angazhim u konfirmua nga sekretari amerikan i shtetit, Marco Rubio, i cili rihapi ndëshkimin e zyrtarëve të lartë duke lajmëruar sanksione ndaj ish-presidentes se Argjentinës dhe një ish ministër të këtij vendi.
“Sot, njoftova sanksionin sipas ligjit 7031(c) të ish-presidentes së Argjentinës, Cristina Elisabet Fernandez de Kirchner dhe ish-ministrit argjentinas të planifikimit, Julio Miguel De Vido, për përfshirjen e tyre në korrupsion të rëndësishëm gjatë kohës së tyre në poste publike. Shtetet e Bashkuara janë të përkushtuara për të siguruar që të ketë përgjegjësi për zyrtarët e korruptuar në mbarë botën”, tha Marco Rubio.
Të premten, departamenti amerikan i shtetit i dha një tjetër goditje Sali Berishës. Një raport i ri për pastrimin e parave vlerësoi punën e SPAK duke u ndalur specifikisht tek inkriminimi i ish kryeministrit dhe pasurimi i familjes së tij. Akuzat e ngritura nga Berishës për korrupsion nga prokuroria, DASH, i cilësoi sukses.
Vetë kryedemokrati ka qenë i rezervuar mbi lëvizjet e fundit përtej oqeanit, edhe pse thotë se vijon të frymëzohet nga Donald Trump, administrata e së cilit në mandatin e pare të qeverisjes, nisi edhe procedurat për shpalljen e tij non grata.
“Më ka frymëzuar shumë Donald Tramp kur guxoi të thotë se armiku më i rrezikshëm është armiku i brendshëm, në kuptimin që janë ata që mbanin flamurin e censurës, që politizonin në mënyrë ekstreme drejtësinë, që ndërmerrnin shkatërrimet masive të simboleve të historisë së SHBA si në revolucionin kulturor kinez apo kundër kishave dhe xhamive në Shqipëri”, është shprehur Berisha.
