Loading ...
Shtetet e Bashkuara të Amerikës kanë këshilluar Izraelin të shtyjnë ofensivën tokësore të paralajmëruar në Rripin e Gazës kundër organizatës islamike Hamas, sipas një raporti.
“Qeveria amerikane shpreson të marrë më shumë kohë për negociatat për të siguruar lirimin e më shumë se 200 pengjeve të mbajtura nga Hamasi në Gaza”, raportoi të dielën “The New York Times”, duke cituar zyrtarë të qeverisë amerikane.
Qëllimi është të shmangen viktima të mëtejshme civile dhe të sigurohet që më shumë ndihma humanitare të arrijnë tek popullsia në Rripin e Gazës të bllokuar.
Kryeministri izraelit, Benjamin Netanyahu njoftoi ofensivën tokësore pasi Hamasi vrau qindra njerëz dhe rrëmbeu më shumë se 200 të tjerë në sulmet terroriste në territorin izraelit më 7 tetor.
Deri më tani, ushtria izraelite ka sulmuar qindra objektiva të Hamasit në Rripin e Gazës me popullsi të dendur.
“Të premten, Hamasi liroi çuditërisht dy pengje amerikane, gjë që bëri që qeveria amerikane të këshillonte Izraelin të shtynte ofensivën tokësore”, sipas raportit të New York Times.
Grupi islamik, i cilësuar si një organizatë terroriste në SHBA dhe Bashkimin Evropian, paralajmëroi se ofensiva tokësore do ta bënte të pamundur lirimin e pengjeve të tjera. Këto negociata zhvillohen kryesisht përmes Katarit, i cili ka lidhje të ngushta me liderët politikë të Hamasit.
“Duke e vonuar ofensivën tokësore, SHBA-ja synon të fitojë më shumë kohë për t’u përgatitur për sulmet nga grupet pro-iraniane ndaj objektivave amerikane në rajon”, raportoi gazeta. Sipas burimeve të “The New York Times”, qeveria amerikane vazhdon të mbështesë pushtimin tokësor dhe qëllimin e Izraelit për të zhdukur Hamasin.
