Loading ...
Shtetet e Bashkuara dhe Ukraina kanë firmosur një marrëveshje të rëndësishme të partneritetit ekonomik pas disa muajsh negociata intensive.
Sekretari i Thesarit të SHBA-së, Scott Bessent deklaroi në një postim në rrjetin “X” se: “jam i lumtur të njoftoj nënshkrimin e marrëveshjes historike të partneritetit ekonomik të sotëm midis Shteteve të Bashkuara dhe Ukrainës, duke krijuar Fondin e Investimeve për Rindërtim midis Shteteve të Bashkuara dhe Ukrainës, për të ndihmuar në përshpejtimin e rimëkëmbjes ekonomike të Ukrainës. Siguria ekonomike është siguri kombëtare”.
Ai thekson se “do të punojmë ngushtë me Qeverinë e Ukrainës për të krijuar këtë fond dhe mezi presim ta vëmë në funksionim të shpejtë këtë partneritet historik ekonomik si për popullin ukrainas ashtu edhe për atë amerikan”.
Nënshkrimi i marrëveshjes konfirmohet edhe nga ministrja e Ekonomisë së Ukrainës, Yulia Svyrydenko e cila në një postim në rrjetin social “X” shprehet se “në emër të Qeverisë së Ukrainës, nënshkrova Marrëveshjen për krijimin e një Fondi Investimesh për Rindërtim midis Shteteve të Bashkuara dhe Ukrainës. Së bashku me Shtetet e Bashkuara, po krijojmë Fondin që do të tërheqë investime globale në vendin tonë”.
