Loading ...
Shtetet e Bashkuara të Amerikës do të nënshkruajnë një marrëveshje me Rumaninë për një hua të drejtpërdrejtë prej 920 milionë dollarësh për të mbështetur programin e modernizimit të mbrojtjes të Rumanisë, njoftoi këtë të mërkurë qeveria rumune.
Sipas marrëveshjes së huasë amerikane, Ministria Rumune e Mbrojtjes do të ketë akses të drejtpërdrejtë në shumën prej 700 milionë dollarësh, ndërsa deri në 220 milionë dollarë do t’i drejtohen kompanisë shtetërore ROMARM, e cila kontrollon 15 kompani që prodhojnë armë dhe municione, duke përfshirë barut dhe raketa të drejtuara, raporton Reuters.
Kredia, e cila është dhënë nga Shtetet e Bashkuara përmes mekanizmit për Shitjet Ushtarake të Jashtme (FMS), ka një plan shlyerjeje prej 12 vitesh.
Marrëveshja do të nënshkruhet ndërsa Rumania kërkon të avancojë planin e saj të modernizimit të mbrojtjes pas pushtimit rus të Ukrainës.
Rumania, një anëtare e NATO-s dhe Bashkimit Evropian, planifikon të shpenzojë 2.5 për qind të PBB-së së saj për mbrojtjen./abcnews.al
