Xherdan Shaqiri është futbollisti shqiptar më i suksesshëm në botë. Ai ka fituar 2 herë Champions League, 2 herë Botërorin e Klubeve, 3 herë kampionatin në Gjermani me Bayern, dy Kupa Gjermanie (DFB Pokal), 1 Superkupë Gjermanie, 2 Superkupa Evrope, 3 herë kampionatin në Zvicër me Baselin, 2 herë Kupën e Zvicrës dhe 2 herë është shpallur futbollisti zviceran i vitit.
Sulmuesi i “The Reds” ka dhënë një rrëfim interesant për sajtin zyrtar të klubit, duke e nisur me fëmijërinë dhe hapat e para në futboll. 28-vjeçari nga Gjilani tregon ndryshimin e madh që ka ndodhur në 15-20 vitet e fundit, flet me emocione për Ronaldon fenomenin, idhullin e tij të madh, dhe e mbyll me ndjesinë që përjeton nga tifozët e shumtë kudo që shkon.
FËMIJËRIA – “Jam rritur duke luajtur në parqe dhe fusha të vështira, luaja gjatë gjithë kohës në rrugë. Aty mund të ndodhte çdo gjë, qëllonte të shihje njerëz duke u zënë mes tyre. Ishte e vështirë të luaje në kushte të tilla, teksa unë isha më i vogli aty. Jam sfiduar gjithmonë me lojtarë më të mëdhenj dhe kjo më ka ndihmuar për t’u rritur e përmirësuar. Kam mësuar shumë, si të jesh gati për duele, si të fitosh, si të arrish suksese. Kjo më ka ndihmuar të bëhem më i shkathët, pasi futbolli i rrugës luhet me instinkte”.
STILI – “Unë jam një futbollisti i tillë, më pëlqen të shpik një pasim fantastik nga asgjëja dhe të shënoj gola të bukur. Kjo është një cilësi që e ke mësuar në rrugë. Koha ka ndryshuar, fëmijët e sotëm kanë PlayStatios, iPhones dhe mund t’i luajnë këto lojëra me telefon nga shtëpia. 15-20 vite më parë ishte ndryshe. Jam i lumtur që e kam shijuar atë kohë, kam mësuar shumë. E di se si është të mos kesh një jetë kaq të bukur sa tani”.
IDHULLI – “Ronaldo fenomeni. E pëlqeja shumë stilin e tij, luante një futboll të mrekullueshëm. Ai ka qenë idhulli im i madh. I qetha flokët si Ronaldo në vitin 2002, u shokuan të gjithë në shkollën time. E kam dashur shumë Ronaldon dhe vazhdoj ta dua. Qava shumë kur humbi finalen e Kupës së Botës në vitin 1998, ai ishte heroi im”.
EMOCIONET – “E ndjej respektin që kanë njerëzit për mua në gjithë botën. Ata e dinë çfarë kam arritur, e dinë që kam luajtur me skuadra të mëdha dhe kam fituar tituj, më njohin kudo që shkoj. Më pëlqen shumë, ndonjëherë njerëzit e ekzagjerojnë me respektin e tyre, por mbetet një ndjesi fantastike”.
TIFOZËT – “Liverpool ka tifozë në çdo vend. Në Zvicër ka shumë, por edhe në Shqipëri e Kosovë, njerëzit janë të çmendur pas kësaj skuadre. Shumë janë tifozë prej vitesh me Liverpool, të tjerë u bënë pas transferimit tim këtu. Në Zvicër gjen edhe tifozë të Stokes, u bënë prej meje sigurisht”. /abcnews.al
