TIRANË– Shtatori do të nisë me vrull për socialistët. Këtë të diel, rreth orës 10:00, kryeministri Edi Rama ka mbledhur qeverinë në Dajt për të analizuar sezonin e ri politik dhe për të vendosur objektivat për në vazhdim, pak muaj përpara zgjedhjeve të përgjithshme parlamentare.
Me pjesëmarrjen e ministrave, drejtuesve të organeve të varësisë, takimi do t’i shërbejë edhe analizës së progresit për qeverinë Rama, e cila synon mandatin e katërt në 2025.
Gazetarja e ABC News, Fjona Xhafaj raportoi se në këtë takim nuk do jenë prezentë drejtuesit e bashkive, edhe pse më parë ishte njoftuar se mund të ishin në tryezën e diskutimit, e cila pritet të zgjasë deri në orën 18:00.
Shefi i socialistëve do të vendosë nëse do të ketë apo jo ndryshime tek anëtarët e kupolës, drejtues të partisë apo edhe nga sekretariati rozë.
Kjo mbledhje në vilën qeveritare, e cila tanimë është kthyer në traditë po ndez motorët për Partinë Socialiste me takimin 1 ditor në Dajt, por do të pasohet në 8 shtator me Asamblenë e socialistëve. Ajo pritet më pas të zgjedhë kryesinë e re të PS, anëtarët e të cilës do të jenë edhe të dërguarit politikë në dymbëdhjetë qarqet e vendit.
Diskutimet me përfaqësuesit politikë dhe anëtarët e kabinetit qeveritar krahas zgjedhjeve të pranverës do të përqendrohen në reformat e integrimit dhe politikën e jashtme, pak javë përpara mbledhjes së dytë ndërqeveritare me Bashkimin Europian për çeljen e negociatave.
Megjithatë shtylla të tjera diskutimi do të ketë edhe për mirëqeverisjen, rendin dhe sigurinë, në formën e një bilanci në mbyllje të këtij mandati qeverisës./ abcnews.al
