Kuvendi nuk do mblidhet nesër në seancë plenare si çdo të enjte. E njoftoi kryetari i Kuvendit Gramoz Ruçi, bazuar siç tha në informacionet e autoriteteve për akte dhune në protestën e të enjtes para Kuvendit, por edhe për t’i dhënë opozitës një hapësirë për reflektim e kthim në institucione.
“Ndoqa nga afër, nga fillimi deri në fund për pesë orë rresht protestën e 16 Shkurtit. Po ndjek me shumë shqetësim veprimet e partive opozitare për djegien e mandateve parlamentare. Po ndjek me vëmendje, vendimin dhe përgatitjen e opozitës për protestën e 21 Shkurtit pranë sallës së Kuvendit, në të njëjtin datë dhe orë me seancën parlamentare. Pamjet e trishtueshme në godinën e qeverisë të gjithë e pamë se bënë xhiron e botës. Kush nuk na do të mirën si vend, fërkoi duart. Kush na ka mbështetur e mbështet e ndihmuar pa dyshim është ndjerë keq. Ndërsa kush ka bërë plane për pushim, padyshim që është stepur. Këto pamje nuk janë inkurajuese as për investitorët e as për konsumatorët.
Duke pasur parasysh historinë e afërme jo gjithçka që ndodhi ishte për ta hedhur poshtë. Janë për t’u përshëndetur ata qytetarë që demonstruan në mënyrë paqësore pakënaqësinë e tyre por edhe ata djem e vajza në uniformë në Polici e Gardë. Qëllimi për nxitjen e dhunës nuk u përmbush, institucionet u mbrojtën me profesionalizëm dhe asnjë protestues nuk u dëmtua fizikisht. E kam falënderuar ministrin e Brendshëm, lidershipi i tij i urtë e i vendosur ka bërë diferencën e madhe të protestës së javës së shkuar dhe asaj të disa viteve më parë që u kthyen në tragjedi. Por mos të harrojmë se pamjet e dhunës kanë një pasojë të dëmshme për proceset integruese. Si kryetar Kuvendit dhe si deputet jam jashtëzakonisht i shqetësuar për këtë situatë.
Nuk do të doja kurrë realizimin e skenarit të paralajmëruar nga vetë opozita për djegien e mandateve sepse një opozitë që vetëvritet politikisht i bën vendit një dëm të madh. Mesazhet e djeshme të BE dhe SHBA më kanë lënë shijen e hidhur të një të vërtete të papëlqyeshme. Një skenar i tillë i padëgjuar është një lloj kamikazllëku që hedh në erë të zotët e punës por dëmton dhe të tjerët. Nuk është momenti të komentoj mbi këtë skenar. Mund të them që ultimatumet nuk janë demokratike. Pushteti nuk merret në tavolinë dhe populli është tërësia e qytetarëve që na mandatojnë me votë. Si kryetar i Kuvendit dhe si dikush që kam parë shumë në atë çati duhet të them sot se opozitë më të garantuar për lirinë e shprehjes se kjo e sotmja nuk ka pasur. Prej 5 vite e gjysmë kjo opozitë ka pasur atë që opozita e dikurshme luftoi 4 vjet e gjysmë e nuk e mori dot. Prej 1 viti e gjysmë kjo opozitë ka konsumuar akte të pandodhura më parë në Sallën e Kuvendit”, tha Ruçi. /abcnews.al
