Ministrja e Shëndetësisë Ogerta Manastirliu është pyetur pasditen e së enjtes nga gazetarët nëse ka një plan për të evidentuar dhe trajtuar personat me probleme të shëndetit mendor.
Pas mbledhjes në Kryeministri, Manastirliu u shpreh se me miratimin e buxhetit për vitin 2022, do të nisë ngritja e qendrave të mjekësisë familje në të cilat, sipas saj, do të ketë edhe punonjës socialë e psikologë.
Po ashtu, ministrja tha se parashikohet që të ngrihen edhe qendra komunitare dhe shtëpi familjeje për trajtimin e rasteve me probleme të thelluara të shëndetit mendor.
“…kemi një plan veprimi që shtrin efektet e tij në të gjithë sistemin. Kemi ndërtuar shërbime alternative për persona që preken nga probleme të shëndetit mendor. Ka një plan për të integruar shërbimet sociale dhe ato shëndetësore. Do të ngremë qendra të mjekësisë familjare, me punonjës socialë e psikologë për evidentimin dhe për përkujdesjen e problematikave. Implementimi fillon me buxhetin për 2022. Qasja për këto problematika kërkon vëmendjen e të gjithëve, dhe të strukturave që kanë përgjegjësi.”
Pas ngjarjes së rëndë të Fierit ku tetëvjeçari Mateo Vasiu u rrëmbye dhe u vra barbarisht nga fqinji i tij Klodian Çalamani, reagimi i opinionit publik ka qenë i madh. Të shumtë janë ata që ngrënë pikëpyetje rreth personave që mund të kenë probleme të shëndetit mendor dhe nuk janë diagnostikuar dhe nga momenti në moment mund të kthehen në rrezik serioz për jetën e qytetarëve të tjerë. /abcnews.al/
