Sulmuesi i Juventusit, Cristiano Ronaldo, mund të largohet nga bardhezinjtë në fundin e sezonit. Sipas raportimit të “Tuttosport”, drejtuesit torinez do të bëjnë çmos për të rinovuar me portugezin, por ky i fundit mund të tundohet nga një aventurë e mundshme me PSG-në.
Deri më tani nuk ka asgjë konkrete, por pritet për tu parë në fundin e sezonit nëse do të këtë vërtet një interesim nga francezët apo është thjesht një fantazi merkatoje. Në fakt janë disa faktorë që mund të ndikojnë në largimin e CR7.
Kështu nëse “Zonja e Vjetër” arrin të fitojë Champions League, atëherë 35-vjeçari do të kërkojë stimuj të rinj dhe ideja se ai mund të luajë në një kampionat të ri mund ta tundojë atë. Gjithsesi është ende shumë shpejt, pasi ende nuk ka filluar faza e grupeve e kompeticionit europian.
Faktori i dytë është ai ekonomik, por peshën më të madhe në vendimin e Ronaldos do ta ketë ecuria e këtij sezoni, prandaj na duhet të presim deri në maj për të parë nëse ai do të largohet apo jo. /abcnews.al
