Edinson Cavani firmosi tetorin e kaluar me Manchester United një kontratë deri në fund të sezonit. Deri tani ka shënuar 8 gola (2 asiste) në të gjithë kompeticionet me ekipin anglez.
Trajneri Ole Gunnar Solskjaer e ka shprehur publikisht vlerësimin për “El Matador” dhe dëshirën për të zgjatur me një tjetër vit bashkëpunimin me goleadorin e njohur.
Pavarësisht kësaj, 34-vjeçari nga Uruguai nuk është përshtatur me jetën në ishull, ndjen mall për familjen dhe dëshiron të rikthehet në Amerikën Latine.
“Djajtë e Kuq” nuk janë dorëzuar dhe besojnë se do ia dalin t’i ndryshojnë mendjen sulmuesit të njohur. Një ndihmë u vjen edhe nga Oscar Tabarez, trajneri i kombëtares së Uruguait.
74-vjeçari është përfshirë në këtë çështje dhe gjatë telefonatës që ka kryer me lojtarin i ka këshilluar këtij të fundit që të mos largohet nga futbolli evropian.
Tabarez ka insistuar që Cavani të vijojë të luajë në kontinentin e vjetër për të qenë në formë sa më të mirë për Botërorin Katar 2022, aty ku 2 herë kampionët e botës kanë pretendime të mëdha. /abcnews.al
