OFL ka kërkuar justifikimin e pasurisë së 2 personave, Aleko Durdës dhe Arben Bërballës. Të dy emrat që komunikoi sot OFL janë të njohur për organet e drejtësisë.
Aleko Durda e Arben Bërballa, kanë qenë të dënuar për armëmbajtje pa leje, falsifikim vizash, krijim i bandës së armatosur dhe organizatës kriminale, gjithashtu dhe trafikim të lëndëve narkotike.
Ata janë anëtarë të grupi të quajtur “Kokaina” e cila shkaktoi bujë në media në vitin 2001.
Të arrestuarit e dosjes “Kokaina” ishin të akuzuar për organizimin e trafikut të narkotikeve dhe kokainës, nga Kolumbia në Shqipëri në vitin 2001, krijim të organizatave kriminale, trafikim të lëndëve narkotike, armëmbajtje pa leje.
Këto akuza dërguan në burg edhe ish-shefin e policisë, Sokol Koçiu, së bashku me pesë persona të tjerë, në vitin 2001.
Pesë pjesëtaret e grupit “Kokaina” ishin: Arben Perballa me 15 vjet, Sokol Kociu me 15 vjet, Mentor Hadergjonaj me 7 vjet burg , Vehbi Hysi me 5.5 vjet, ndërsa Alfred Nanaj, me 6 vjet burg.
Grupi “Kokaina” është i vetmi grup i shkatërruar i trafikut të kokainës, e më tej edhe i dënuar.
Durda kishte njohje të vjetra me Bërballën, njohje të cilat kanë lindur mbi bazën e një lidhjeje familjare, por që më pas u konsolidua mes tyre edhe nga emigracioni në Shtetet e Bashkuara të Amerikës.
Bërballa dhe shefi i Policisë, Sokol Koçiu ishin takuar më herët në Mirditë ku kishin punuar në sektorë të ndryshëm.
Provat e fajësisë:
Prokuroria në atë kohë paraqiti në Gjykatën e Tiranës një sërë provash për të vërtetuar fajësinë e personave të marrë si të pandehur.
1-Procesverbali i kontrollit të banesës si dhe kontrolli personal i të pandehurit Durda, në 2 shkurt të vitit 2001, së bashku me të gjitha provat materialet që janë gjendur e sekuestruar gjatë këtij kontrolli, (paratë, arma, dokumentacioni, blloku i telefonave).
2-Procesverbali i kontrollit të banesës dhe ai personal i të pandehurit Arben Bërballa, bërë në datën 2 shkurt 2001, së bashku me provat materiale e gjetura e të sekuestruara gjatë këtij kontrolli (dokumentacioni fals)
3-Procesverbali i kontrollit të autoveturës me targa TR 0951 C, që i përket shtetasit Frederik Durda, së bashku me provat materiale të gjetura në këtë automjet
4-Procesverbalet e sekuestrimit dhe këqyrjes së motoskafit së bashku me tabelat fotografike
5-Procesverbalet e sekuestrimit të praktikave të pasaportave ndërkombëtare
6-Akt ekspertimi balistik nr.35, të datës 3 shtator 2001
7-Letër-Porositë për jashtë shtetit
8-Përgjimet e bisedave të zhvilluara nga të pandehurit si dhe prova të tjera shkresore të administruara në dosjen e hapur në vitin 2001.
Procesi ndaj tyre ka qenë shumë i bujshëm për vetë faktin se bëhej fjalë për një drejtues i lartë i policisë siç ishte Sokol Koçiu asokohe, ishte i përfshirë në trafikimin e sasive të mëdha të kokainës nga Kolumbia në Shqipëri./abcnews.al
