Loading ...Ndryshimet demokratike në fillim të viteve ’90 dhe rishikimi i historisë, u shoqërua me mbylljen e muzeumeve të LANC në të gjithë vendin mes të cilëve edhe Muzeu i Luftës në Përmet.
Ka qenë kërkesë e familjeve të dëshmorëve të LANC drejtuar Bashkisë së Përmetit, për të riçelur muzeun që do t’i jepte mundësi atyre për të evokuar historinë e forcave çlirimtare gjatë Luftës së Dytë Botërore dhe kësisoj edhe rivendosjes së objekteve apo trofeve të luftës në një godinë të vetme.
Muzeu është përqendruar në aneksin e pasmë të sallës ku më 24 maj të 1944, u mbajt ajo që njihet në historinë shqiptare, si Kongresi i Përmetit në të cilin u vendosën themelet e pushtetit komunist që jetoi gati gjysmë shekulli.
Objekte të ndryshme si armë, fotografi, aksesorë historikë janë gama që evokojnë luftën e forcave partizane në të vetmin muze që rikthehet pas 30 viteve.
Tok me to interesante e bëjnë këtë muze edhe dosjet e dëshmorëve që kanë humbur jetën me pushtuesit e huaj përgjatë viteve 1939-1944.
Këto dosje janë të pasuruara me dokumentacion dhe fotografi tërësisht autentike.
Për kryetaren e Bashkisë së Përmetit Alma Hoxha, ky muze do të pasurohet dhe perfeksionohet edhe më tej pasi sot ka qenë vetëm dita e riçeljes së tij.
Ajo çfarë e bën më interesante këtë muze, është se do të jetë edhe në axhendën e turistëve vendas apo të huaj që do të vizitojnë Përmetin dhe ku sipas shumë gjasave interesi është i madh pasi edhe në të kaluarën, vizitorët vendas apo të huaj që nuk kanë munguar vitet e kaluara në Përmet, kanë shprehur interes për një muze të tillë./abcnews.al
