Janë të paktën 25 viktimat e zjarrit që përfshiu një varkë në brigjet e Kalifornisë, në Shtetet e Bashkuara. Lajmin e bëjnë të ditur mediat amerikane që citojnë burime pranë rojës bregdetare. Këto të fundit kanë deklaruar se 9 persona të tjerë mbeten të humbur.
Zjarri ra në orët e para të mëngjesit të së hënës, me orën lokale, teksa varka ishte ankoruar pranë ishullit Santa Kruz, 145 kilometra në perëndim të Los Anxhelesit. Autoritetet kanë konfirmuar se në bord ndodheshin gjithsej 39 persona, ndërkohë që sa u takon shkaqeve të zjarrit nuk kanë dhënë asnjë përgjigje.
Ndërkohë, 5 anëtarët e ekuipazhit arritën të shpëtonin, pasi u hodhën në ujë përpara se zjarri të përhapej me shpejtësi. Anija “Konsepsion”, 23 metra e gjatë, aktualisht ndodhet e fundosur në oqean dhe ekipet e shpëtimit po vazhdojnë kërkimet pasi dyshojnë se në të ndodhen trupat e mbetur./ABC News Albania 24/7
