Presidenti ukrainas Volodymyr Zelensky tha se kishte diskutuar situatën gjatë fundjavës në Rusi me disa liderë botërorë, duke përfshirë presidentin e SHBA-së Joe Biden.
Zelensky tha se ai foli gjithashtu të dielën me kryeministrin kanadez Justin Trudeau dhe presidentin polak Andrzej Duda.
“Ne kemi shkëmbyer vlerësimet tona për atë që po ndodh në Rusi. Ne e shohim situatën në të njëjtën mënyrë dhe dimë se si të reagojmë”, tha Zelensky, duke shtuar: “Agresioni rus po kthehet gradualisht në portën e tij”.
Zelensky, i cili në një postim të mëparshëm në Telegram e përshkroi bisedën e tij me Biden si “pozitive dhe frymëzuese”, tha se diskutimet e tij përfshinin gjithashtu situatën në vijën e parë të frontit dhe forcimin e mëtejshëm të forcave ukrainase.
Ministri ukrainas i Mbrojtjes Oleksii Reznikov tha se ai ka folur me Sekretarin e Mbrojtjes të SHBA-së, Lloyd Austin për ngjarjet në Rusi, si dhe kundërofensivën e Ukrainës.
“Ne jemi dakord që autoritetet ruse janë të dobëta dhe se tërheqja e trupave ruse nga Ukraina është zgjidhja më e mirë për Kremlinin, ” tha Reznikov në një postim në Twitter.
/abcnews.al
