Reali ka nevojë për të shënuar gola, nëse dëshiron të luftojë për trofe këtë sezon. Presioni rritet edhe më shumë për të marrë brazilianin Neymar, pas dështimit në ndeshjen e fundit në La Liga
Mungesa e Kristianos vazhdon të ndihet, edhe pse edhe vetë portugezi nuk do të kishte çfarë të bënte.
Nuk është shterur talenti në Madrid, por duket se personalitetet janë plakur, ndërsa të rinjtë nuk po e marrin dot “stafetën”, dhe mbi të gjitha mungojnë golat.
Modriç mungoi i pezulluar, Hazar ishte i dëmtuar, Vinisius u la në stol, Asensio është i dëmtuar, ndërsa Zizuja vendosi për Hames Rodrigezin e Iskon titullarë, me më shumë zotërim topi, por me më pak talent e vertikalizim.
“Sa mirë sikur të vinte Nejmari, – shkruhet në kopertinën e gazetës “Marka”, – Madridi krijon raste, por ka një problem me golin”.
Nuk dihet nëse braziliani do të vijë në “Bernabeu”, por mësohet se trajneri Tuhel e ka lënë sërish jashtë ekipit të Paris SG në ligën franceze.
Në mungesë të Ronaldos, dhe pa një sulmues të ri klasi, barazimi në “Bernabeu” ndaj Vajadolidit tregoi se “Reali i Vjetër” nuk jep garanci.
Pavarësisht se Vinisius e Joviç hynë në pjesën e dytë, ashtu si Lukas Vaskez, ndërsa Bejl ishte në fushë (dhe nuk luajti keq), sërish për golin, madrilenët kanë varësinë nga Benzemaja.
Sulmuesi francez shënoi edhe këtë herë, por ai nuk i ka “breshëritë” e CR7-ës, ndaj duhet mbështetur.
Një problem më vete për “të bardhët” është ai i gabimeve në mbrojtje, ndërsa i dhuruan golin një kundërshtari me mbiemrin Guardiola.
Zidan duhet të mendojë për ta zgjidhur edhe këtë problem.
“Meritonim më shumë sesa barazimi në këtë ndeshje, – tha trajneri, – ne krijuam shumë raste në pjesën e parë, por problemi ynë ishte se nuk e futëm topin në rrjetë. Pastaj, kur jemi në avantazh ndodh që nuk dimë të ruajmë rezultatin. Duhet të jemi të përqëndruar për 90 minuta”.
“Moral i ulët në tribunë dhe ankth në fushën e lojës, – titullon “Marka”, – publiku i Madridit shumë i zhgënjyer pas barazimit me Vajadolidin”.
Tifozët presin një tjetër përforcim, sidomos në sulm, pasi golat nuk mund të garantohen as me kthimin e Hazarit nga dëmtimi./ABC News Albania 24/7
