Askush tjetër, përveç popullit, as e ka dhe as e merr dot të drejtën të na pengojë në plotësimin e mandatit tonë kushtetues. Kjo vlen edhe për Presidentin e Republikës. Kushtetuta i ka të përcaktuara 12 kompetencat e Presidentit të Republikës dhe aty nuk figuron gjëkundi e drejta e refuzimit të një ministri që gëzon besimin e shumicës.”
Rama tha se nëse do të kishte ekzistuar një e drejtë e tillë, atë do ta kishte zbuluar paraardhësi i Metës, Bujar Nishani.
Deklaratat e Ramës vijnë pas refuzimit të Presidentit Meta për të dekretuar Sandër Lleshin në postin e Minisitrit të Brendshëm. Rama i’u kundërpërgjigj Presidentit Meta duke theksuar se do ta emërojë Lleshin zv.ministër me kompetencat e Ministrit të Brendshëm.
Në përgjigje të deklaratave se Presidenti Meta nuk do të lejojë asnjë përpjekje për të sfiduar institucionin e kreut të shtetit, Rama tha se “nuk po bëj asnjë përpjekje për të sfiduar autoritetin e Presidentit, por as në mendje nuk do ta çoja dot një akt kaq të padobishëm prej tij. Këto ia kam thënë Presidentit e Republikës në një diskutim të hapur.”
“Unë vetë nuk e kam humbur besimin se Presidenti nuk e ka thënë akoma fjalën e fundit për këtë temë, edhe pse afati ka skaduar. Ashtu siç nuk e kisha humbur besimin se Bendo do të dekretohej në krye të SHISH. Sot Helidon Bendo u dekretua në krye të SHISH.” /tvklan.al
