Trajtimi i çështjes së fluksit të emigrantëve do të jetë një nga prioritetet e qeverisë greke të kryeministrit Micotaqis. Në qendër të vëmendjes do të jetë përmirësimi i kushteve të qëndrimit dhe përshpejtimi i procedurave për dhënien e azilit.
Qeveria e re greke ka vendosur shumë lart në axhendën e vet trajtimin e flukseve të refugjatëve dhe emigrantëve.
Kryeministri Mitsotakis ka kërkuar që puna e tyre të fokusohet urgjentisht në gjashtë prioritete, ku më kryesoret janë:
Përmirësimin e kushteve të jetesës për emigrantët dhe refugjatët, kalimi nën komandën greke të trupave të agjencisë Frontex që operojnë në vend, përmirësimi i procedurave për dhënien e azilit.
“Qytetarët grekë ia dhanë votën masivisht zotit Mitsotakis, pse i besuan shpresës për një të ardhme më të mirë në planin ekonomik. Por një javë pas betimit, qeveria e re tregon se ka si prioritet emergjent emigracionin. Mirëpo, shenjat e para të punës së qeverisë në këtë fushë, kanë një ngjashmëri të përpiktë me qeverinë e mëparshme, që e identifikoi gjithë politikën e emigracionit me trajtimin e refugjatëve, duke lënë pas dore shërbimet administrative për atë popullatë të madhe emigrantësh ekonomikë që ndodhen prej gati tre dekadash në Greqi”.
Prej shumë kohësh në këto shërbime janë rikthyer radhët e gjata, ku emigrantët zënë vend që në orët e natës, ndërsa u duhet të presin më shumë se dy vjet për të marrë lejet e qëndrimit.
Një nga shkaqet e kësaj situate ka qenë indiferenca e qeverisë së mëparshme për të siguruar personelin e nevojshëm, si dhe disa ndryshime ligjore që e vështirësuan më tepër një pjesë të procedurave.
Tashmë, kryeministri i ri e ka kaluar politikën e emigracionit në ministrinë e mbrojtjes së qytetarit, akt që është kritikuar nga opozita dhe organizatat për të drejtat e njeriut. /ABC News Albania 24/7
